Aruba no tin un Gobierno completo, ya cu falta dos minister ainda pa wordo nombra y huramenta pa Gobernador. Motibo conoci pa esaki ta cu screening ta cla, pero e formadornan Eman y Croes no tin fin di nombra e ministernan cu falta. Dos persona ta den tapara pa bira minister, Mike de Meza como Minister di Infrastructura y Energia, y Baba Herde como Minister Plenipotenciario na Hulanda.
Minister di Infrastuctura y Energia
Tur cos ta mustra cu Mike de Meza su screening no a bay bon y awo hasta e ta bay hues contra Departamento di Impuesto (DIMP) riba e resultado di e screening. Sinembargo no ta DIMP ta dicidi si De Meza ta bira minister, ta e formadornan Mike Eman y Gerlien Croes mester tuma e desicion. Ta nan dos mester manda nan ‘voordracht’ pa Gobernador bisando cu nan ta nombra Mike de Meza como minister. Esey no a pasa, dus De Meza mester lanta caso contra Mike Eman y Gerlien Croes cu no tin fin di manda su nomber na Gobernador pa e por bira minister.
Minister Plenipotenciario na Hulanda
Otro puesto importante cu ainda no a wordo yena ta Minister Plenipotenciario, Aruba su GevMin na Hulanda. Manera cu e Gobierno a sinta, Mike y Gerlien a manda GevMin Ady Thijsen cas y Aruba a keda sin representacion den Conseho di Minister di Reino, Rijksministerraad. A wordo bisa cu ta Baba Herde lo mester bira Aruba su GevMin na Hulanda, pero te ainda nada ta pasando. Ta ser bisa cu Baba su edad ta mucho avansa pa e posicion, pero lamentablemente ni Eman, ni Gerlien ta splica Pueblo ta ken lo bira Aruba su GevMin. Net awo cu tin asunto di Rijkswet pa atende, Aruba no tin representacion den Rijksministerraad, debi cu Eman ta keda draai manera un draaitol y Gerlien ta laba man pa no tuma desicion si Mike de Meza ta bira minister of no.
Falta di liderazgo y responsabilidad ta perhudica Aruba
Tur e tardansa aki den nombracion di e dos ministernan cu falta, ta perhudicando Aruba. Ya caba Pueblo mester a warda largo pa Aruba por a haya un Gobierno nobo, y awo ni Eman y ni Gerlien ta asumi responsabilidad of mustra liderazgo pa caba di nombra e dos ministernan cu falta. Eman ta prefera ta draai rond manera un draaitol y Gerlien ta purba laba man y ta laga Pueblo pa su cuenta.
