Na 1970, trinta persona a perde nan bida den trafico, siendo cu e tempo ey tabata tin menos cu 12 mil auto y 275 brommer na Aruba. Esaki tabata e prome aña cu a kibra record di morto den trafico. 1970 a marca historia den nos trafico.
E Gezaghebber y gobernantenan e tempo ey tabata pidi pueblo pa ta mas responsabel den trafico, no core auto bou influencia, no core duro etc etc. Nos a compila tur e accidentenan fatal di 1970, pues nos ta papia di 55 aña pasa.
Mirando e seriedad di e insiguridad den trafico na 1970, a cuminsa concientisa e pueblo, pa bira mas responsabel den trafico, te awe ainda tin cu sigui haci esaki. E gobernantentan na 1970 a pidi polis pa cuminsa tene mas control. Varios propuesta di cuidadanonan tabata yega na e Gezaghebber di e tempo, pidiendo pa cambio di leynan y pa cuminsa na bira poco mas streng, pa tene controlnan cu mas frecuencia, tambe a cuminsa pidi pa motociclistanan bisti helm pero no tabata tin controlnan pa cu esaki. Awendia por mira si cu e iniciativa di e tempo ey poco poco a haya forma y cu awendia e insiguridad den trafico t’ey pero no manera na 1970. Nos ta na 2025 y ainda e causanan di accidente ta keda mayoria di biaha, door di actonan iresponsabel, manera core cu velocidad halto , of bou influencia.
1967 tabata tin 7 morto den trafico
1968 tabata tin 12 morto den trafico
1969 tabata tin 18 morto den trafico
1970 tabata tin 30 morto den trafico
Cuater persona ta perdenan bida den e prome accidente fatal di 1970
Tanki Leendert, January 27 1970
E prome accidente fatal na 1970, tabata riba dia 27 di januari den oranan di anochi. Esaki tabata riba un diamars anochi na Tanki Leendert, riba e caminda di Solito pa Tanki leendert, den area di e actual rotonde Tanki Leendert di Watty Vos Boulevard. E tabata un accidente horibel den cual 4 persona a fayece. E cuater personanan tabata Andries Picauly (41) y su casa Sonia Picauly Smit(38), Evert Fekkes(32), Engelbert van den Berg di Corsou.
E pareha Picualy y Fekkes a yega Aruba na december 1969 y nan a bay hunto cu Engelbert pa mira un cas pa nan huur den area di Tanki Leendert. Ambos meneer Picauly y Fekkes a imigra pa Aruba pa asina bin traha como meneer di scol. E tabata un accidente frontal, e victimanan tabata den un Fiat-125 cu a dal frontal contra un Ford-Taunusbus cu consecuencianan devastador, 7 persona herida y 4 cu a perde nan bida. Un accidente hopi tristo, cu sigur a shock henter e comunidad di Aruba. E pareha Picauly a laga 3 yiu chikito atras, un di 8, 6 y 4 aña.
Un tata di 9 yiu a bira di 5 morto den trafico
Buena Vista, 16 februari
No a dura ni un luna, cu a sosode un otro accidente fatal, esaki tabata riba 16 di Februari 1970, e biaha aki e accidente fatal a sosode na Buena Vista, den e bocht di Buena Vista net patras di actualmente e cura di airport. E chauffeur di fam Tromp di 43 aña cu tabata biba na Wayaca, a perde control ranca un borchi trafico, dal contra un mata y a bolter cu su auto. E tempo ey na Aruba no tabata exigi pa bisti seatbelt, cu e consecuencia cu durante e impacto e la wordo saca for di e auto y esaki a cay riba dje. Mesora autoridad a yega na e sitio y den un estado critico e la wordo transporta cu urgencia pa hospital pero a fayece su siguiente mainta. Un di e ocupantenan di e auto tambe a keda herida y tambe a wordo transporta pa hospital, pero e si a sobrevivi. E meneer Tromp aki a laga 9 yiu atras.
Auto ta drenta bou truck y un hoben a fayece mesora
Savaneta, 28 februari
Ni dos siman despues di e accidente fatal di Tromp, dia 28 Februari 1970, den careda di 4’or di atardi a sosode un accidente hopi serio, den cual dos persona a keda seriamente herida. E accidente aki a sosode un poco mas pabou di Commandeursbaai Club na Savaneta. Un truck a bay bira riba e caminda principal, pero e caminda tabata muha, e truck a slip, y no por a bira lihe y e parti patras di e truck tabata ainda riba e parti di caminda y net na e momento ey tabata biniendo un auto di direcion contrario cu velocidad hopi halto. E chauffeur no por a regula su velocidad na tempo y lamentabelmente e auto a drenta bou di e truck, den e auto tabata tin 5 persona, tres a keda gravemente herida y dos levemente herida. Ambulance di San Nicolas y di Oranjestad mester a presenta pa yuda transporta e 5 heridonan, cu hopi urgencia nan a wordo transporta pa Hospital. Diadomingo mainta e hoben R. van der Linden di 20 aña cu tabata biba na Mabon a fayece.
Dos criatura caminda pa cas ta wordo gedal y esun di apenas 8 aña a fayece
Savaneta, 4 maart
Den menos cu un siman, e trafico insigur na Aruba ta eixgi bida di un criatura di apenas 8 aña. Diaranson 4 di maart 1970, na Savaneta, dos ruman muhe di fam Greaux despues cu scol a caba tabata canando pa bay cas, esaki tabata den careda di 12’or y cuarto di merdia. Na altura di e ex carniceria De Cuba (pariba di Do it Center Savaneta), e dos muchanan a crusa e caminda grandi y no a pone tino cu net na e momento ey tabata biniendo un auto. Ambos a wordo alcansa pa e auto y a keda herida, esun di 8 aña su situacion tabata hopi critico. Ambos a wordo hiba hospital, e otro ruman a kibra su pia, pero su situacion no tabata grave. Lamentabelmente pa mas o menos 9 ‘or y 45 di anochi e ruman muhe di apenas 8 aña a fayece y tabata e di 7 morto di trafico di 1970.
Un otro victima di e accidente entre auto cu truck a fayece
Savaneta, 11 maart
Dia 11 di maart 1970, a drenta e noticia cu na San Pedro hospital, un di e victimanan di e accidente di 28 di Februari tambe a fayece tabata trata di F. Thijssen di 19 aña tabata envolvi den e accidente pabou di Commandeursbaai Club. Mientras cu un otro victima mas di e accdente aki, tambe tabata hospitalisa y su situacion tambe tabata critico.
Pareha turista ta fayece scooter ta drenta bou pickup
Eagle Beach, 26 maart
Diahuebs 26 di maart 1970 a sosode un accidente fatal hopi tristo cu a costa bida di un pareha turista, ambos tabata Venezolano. E homber tabata un dokter na Venezuela. E pareha aki a bin Aruba, cu algun miembro mas di famia, pa pasa e dianan di semana Santa na Aruba y alabes pa celebra cumpleaños di e Dokter tambe. E diaranson cu a pasa nan a celebra su cumpleaños un fiesta cu bebemento y yen di ambiente. E doctor di fam Tinoco no tabata sa kiko destino tabata tin prepara p’e su siguiente dia. Diahuebs nan a lanta trempan pa sigui gosa di nan vacacion, Dr. Tinoco y su ruman homber, Ingeniero Tinoco a dicidi di huur dos scooter pa nan bay keiro rond. E dokter hunto cu su casa a bay riba un scooter y riba e otro scooter su ruman cu su casa. Den oranan di merdia nan a sali di Manchebo Beach Resort unda nan tabata hospedando, pa bay Palm Beach, pa motibonan desconoci e Dr. a tuma e caminda cu ta verboden y a bay nort, den direccion contrario, net na e momento ey tabata biniendo un pickup, e chauffeur di e pickup a trata na evita e accidente, pero lamentabelmente no a logra, e impacto tabata algo horibel, e doctor y su casa a keda pega bou di e pickup y esaki a lastranan como 20 meter mas leu. E dokter y su casa a muri mesora na e sitio. Zepp Wever a busca e curpanan y a hibanan hospital pa asina preparanan pa transportanan cu avion pa Venezuela.
Dr Tinoco tabata sobrino di e Minister di Financia di Venezuela di e tempo ey. Den e prome 3 lunanan so di 1970, Aruba a conoce 10 morto den trafico.
Chauffeur hoben ta dal cu su auto den truck di sushi
Oranjestad, 17 april
Diabierna 17 di April 1970 un biaha mas a tuma lugar un accidente fatal, e biaha aki e la sosode den Oranjestad, tabata den careda di 4’or di atardi, un mucha homber di 21 aña, tabata coriendo su auto, un auto chikito, e la sali for di Julianastraat y na altura di pleinchi di Boy Ecury, e no a pone bon atencion riba caminda y no a duna un truck di sushi preferencia, e la sali su dilanti. E impacto tabata demasiado fuerte cu e hoben a keda gepress den e auto, e la wordo saca for di e auto y asina mes den un estado hopi critico a wordo transporta pa hospital, pero lamentabelmente na yegada e la fayece. Aki tabata trata di un hoben di fam Sarda, cu a bira e di 11 morto den trafico. E hoben aki tabata traha na e Agencia Pan Americana.
Aña di La Reina auto a bolter y dia 9 di mei e victima a fayece
Eagle Beach, 30 april/09 mei
Riba fiesta di aña di La Reina, 30 di april 1970, un diahuebs, e meneer P. Maduro di Cas Ariba, tabata coriendo cu su auto riba boulevard y na altura di Manchebo Beach, pa un of otro motibo a perde control cu su auto, a baha caminda y a bolter. E homber Maduro di 25 aña di Cas Ariba a keda gravemente herida. E la wordo transporta pa San Pedro Hospital, caminda e la keda lucha algun dia pa su bida, pero lamentabelmente dia 9 di mei, e la fayece. P. Maduro tabata e di 12 morto den trafico.
Velocidad halto a costa bida di un cabayero fam Alberto
Wayaca, 11 mei
Dialuna 11 di mei 1970, den oranan di mainta, e homber di fam Alberto tabata tras di stuur di su auto y riba e caminda principal di Oranjestad pa San Nicolas, na altura di e cura di airport ( Wayaca), e homber di fam Alberto (24) a perde control cu su auto y a bolter. E la haya hopi sla paden y a wordo transporta cu ambulance cu hopi urgencia pa San Pedro Hospital. Riba e mesun dialuna aki, den oranan anochi, famia a ricibi e tristo noticia cu e la fayece. Aparentemente e lo tabata core cu velocidad halto y a perde control.
Truck a pasa riba un tata di 7 yiu
Shete, 18 mei
Dialuna 18 di mei, un biaha mas e trafico insigur ta cobra bida di un otro persona, esaki a sosode na Shete, un tata di famia di 40 aña, aparentemente e lo tabata drumi riba caminda y un dumptruck a pasa riba dje. E chauffeur di e truck no a ni ripara of ni a sinti cu e la pasa riba un persona y a sigui core. Despues cu e la yega cas y a tende e noticia riba radio, e la dicidi di bay polis. E victima, un tata di famia, di fam Werleman, cu tabata traha na telefoondienst ( actual SETAR). Meneer Werleman tabata biba na Sabanilla Abou y a laga 7 yiu atras.
Cay for di su brommer haya mal sla y a fayece,
Bernhardstraat, San Nicolaas, 5 juli
Diadomingo 5 di juli den careda di 4 ‘or di marduga, den Bernhardstraat, J.A. Maxwell di 24 aña, tabata riba su brommer, na dado momento e la mira con un auto a hit and run un otro brommer. J.Alberto a spanta asina hopi cu e la cay for di su brommer, den e caida e la ricibi golpinan fuerte y a fayece. J.A.Maxwell no tabatin helm bisti. E chauffeur cu a hit and run e otro brommer, a sigui core y un poco mas pariba e la dal contra un auto cu tabata biniendo di direccion contrario. J.A. Maxwell tabata tin 24 aña y tabata traha na Shanghai Store. Su tata tabata un persona hopi conoci den e mundo di deporte na Aruba. For di e tempo ey a cuminsa boga pa bin cu un ley pa obliga motociclistanan bisti helm, segun e expertonan di e tempo ey, e helm sigur lo por a scapa su bida durante e caida fuerte.
Criatura di 7 anja ta wordo alcansa pa un auto y ta fayece
Otaheitistraat, San Nicolaas 10 juli 1970
Despues di 5 dia, riba diabierna 10 di juli 1970, den careda di 1’or di merdia, den Otaheitistraat na San Nicolas, un criatura di apenas 7 aña a bay crusa e caminda y no a pone tino cu net na e momento ey tabata biniendo un auto. E chauffeur di e auto no por a brake na tempo y a dal e criatura. E golpinan cu e mucha homber chikito aki a ricibi tabata asina fuerte cu e la fayece mesora na e sitio. E criatura di 7 aña di fam Senchi tabata e di 16 morto pa 1970.
Na caminda pa trabou den WEB, un tata di 5 yiu a wordo alcansa pa un auto y a fayece
Kibaima, 17 juli
Diabierna 17 di juli 1970, e trafico insigur di Aruba a bolbe cobra bida di un persona. Un meneer di fam Peña di 59 aña di edad, tabata biba na Rooi Bosal, tur mainta meneer Peña ta sali pa bay traha na WEB, manera ta custumber e mester crusa e caminda principal di Kibaima pa por yega WEB. Peña no a pone bon tino riba e trafico y a crusa , na momento cu e tabata mitar riba e caminda ta crusando, e la nota cu di pariba tabata biniendo un auto cu velocidad hopi halto. Peña a spanta y a bira pa bay bek, pero lamentabelmente no a logra. E la wordo alcansa pa e auto y a keda seriamente herida, mesora a transport’e cu ambulance, cu hopi urgencia pa San Pedro Hospital, pero na yegada e no tabata duna señal di bida mas. Peña tabata tata di un famia grandi di 5 yiu.` Peña tabata metsla na WEB y tur mainta e tabata cana bay trabou pa mantene su famia. E la bira e di 17 morto di trafico na Aruba pa 1970.
Auto a bolter cu 5 hoben den dje y un a fayece, nan tabata trahado di Bali y Olde Molen
Camacuri, 25 juli
Diasabra 25 juli 1970, den oranan trempan di mainta, un famia Winklaar ta ricibi e tristo noticia cu nan yiu homber di 19 aña a caba di fayece den un accidente . Den careda di 3’or di marduga, un auto a bolter na Camacuri, na altura di e tempo ey Club Caribe, esaki a sosode den e bocht, den e auto tabata tin 5 persona, tur tabata traha sea na Olde Molen of na Bali Restaurant. Entre e 5 personanan aki tabata tin e hoben Winklaar cu na yegada na hospital a bin fayece. Winklaar a bira e di 18 victima di e trafico insigur na Aruba di 1970.
V. Tromp, tabata tata di 4 yiu a crusa caminda y a wordo fatalmente alcansa pa un auto
Pos Chikito, 25 juli
Riba e mesun diasabra aki 25 di juli, un otro accidente fatal, ta ranca un otro tata di famia, aki tabata trata di V. Tromp kende tabata tin 4 yiu. E accidente aki a sosode na e crusada principal di pos Chikito (actualmente e rotonde Pos Chikito). Den careda di 9’or di anochi Tromp no a pone bon tino y a crusa e caminda grandi net na momento cu tabata biniendo un auto. Segun e automobilista, e la trata na evita e impacto, pero esaki tabata imposibel. V. Tromp a fayece mesora, V tabata traha cu Parsons, asina den un lapso di 6 luna e cantidad di morto den trafico a subi te na 19 morto.
Coremento bou influencia y hacimento di wega cu auto, a causa un accidente den cual 5 persona herida y un a perde su bida
Malmok, 28 augustus
Diabierna 28 di augustus 1970, riba L.G. smith boulevard, na altura di Malmok, a sosode un accidente hopi serio. E accidente a sosode den careda di 3’or y cuarto di marduga. Un pickup cu a wordo raporta horta tabata biniendo cu velocidad halto y a bolter. E hoben N. Geerman di 20 aña biba na Congoweg a muri mesora na e sitio. N. Geerman tabata e di 20 morto di trafico pa 1970. Segun investigacion, e hobennan aki tabata pusta auto y e hoben Geerman a fayece na e sitio, dos otro hoben a keda gravemente herida y tambe tres otro a keda levemente herida. Aparentemente esnan mas grave herida lo tabata sinta den baki di e pickup. Un di esnan levemente herida, cu lo tabata e chauffeur, despues di a wordo trata na hospital, mesora a wordo deteni pa core auto bou influencia. E chauffeur no tabata solamente core auto duro pero tabata haci hopi wega cu e auto, e tabata zwaai cu e auto, esaki a pone perde control y bolter. Segun investigacion haci a confirma cu alcohol tambe a hunga un rol den e accidente aki. Segun e chauffeur e kier a djis spanta esnan cu tabata sinta den baki y pa e motibo ey e tabata haci wega cu e auto, core zwaai riba caminda. E curpa di e hoben Geerman a wordo hiba pa Zepp Wever pa prepar’e pa e la wordo dera.
Chauffeur burachi a dal hobencita di 14 aña mata, e hobencita cu dos otro mas tabata bayendo misa
Noord, 27 september
Diadomingo 27 di september 1970, den e districto di Noord, den careda di 6 or y 45 di mainta, tres hobencita a sali di nan cas na Palm Beach y tabata bayendo misa Santa Ana na Noord. Diripente nan a wordo alcansa pa un auto, den e impacto aki e hobencita R. Kelly di apenas 14 aña a perde su bida. E chauffeur di e auto tabata burachi, segun su persona e la bay hala pa un truck cu tabata pasando y a dal e muchanan. Door cu e tabata burachi e la wordo cera pa algun ora ora y durante dia cu e la bira miho, polis a lage liber. Polis e tempo ey no a cere pa motibo cu e la causa un accidente fatal pero pa motibo cu e la stuur auto bou influencia.
Trafico insigur di Aruba a exigi atrobe bida di un criatura di 7 aña
Pos Chikito 07 oktober
Diaranson 07 di oktober den oranan di merdia e trafico insigur di 1970 ta exigi un otro victima, un criatura di apenas 7 aña. Aki tabata trata di I. Kransen kende tabata biba na Spaans Lagoen, E criatura tabata bay scol na Savaneta y manera ta custumber tur dia e ta bin cas cu bus. Diaranson merdia e la baha di bus y a crusa caminda sin pone tino, dilanti di un auto. E chauffeur no por a brake na tempo y a dal e criatura, kende a fayece mesora na e sitio. Un dokter cu tabata cerca a yega basta lihe na e sitio, pero no por a haci nada pa e mucha, e la fayece na e sitio mes. Comisario di polis di e tempo ey mr. Oldenboom tambe a yega na e sitio. E mucha I. tabata e di 22 morto den trafico.
Coremento di auto cu velocidad halto un biaha mas ta causa di accidente fatal
Wayaca, 14 oktober
Diaranson 14 di oktober 1970, ambulance a trece un hoben di 21 aña yama G. Tromp, na San Pedro Hospital na Oranjestad , e hoben tabata den un situacion hopi critico, e lo tabata envolvi den un accidente serio, Tromp tabata den auto cu un otro persona mas, probablemente e tabata coriendo cu velocidad hopi halto y na altura di Wayaca e lo a perde control y a bolter, como 6 biaha ney, ambos persona a keda gravemente herida y cu urgencia nan a wordo transporta pa hospital. Lamentabelmente na yegada e hoben G. Tromp a fayece y a bira e di 23 victima di accidente fatal na Aruba di 1970. G. Tromp tabata biba na Washington.
Hoben motociclista a dal contra palo di lus y na momento cu a bin topa cu ne ya e la fayece
L.G. Smith Boulevard, 24 di oktober
Diasabra 24 di oktober, den careda di 6 or y mey di mainta, polis a bin topa riba Boulevard na altura di Cempro, cu un curpa sin bida benta cerca di un palo di lus y como 20 meter leu den un greppel a bin topa cu un brommer. Mesora polis a haci investigacion y a pidi pa un dokter yega na e sitio. Despues cu polis a haci su investigacion y a ricibi e declaracion di dokter, a resulta cu e persona tabata trata di F. Maduro di 18 aña, kende tabata biba na Ponton. Segun e declaracion di dokter y investigacion di polis, e accidente lo a sosode entre 3 or cu 5 ‘or di marduga y cu F. lo a fayece mesora despues di e impacto fuerte. E tempo ey tabata dera hende riba e mesun dia of un dia despues. Pero F. Maduro mester a keda mas riba tera pa motibo cu su mayornan tabata na Colombia na momento cu e accidente a tuma luga y mester a warda nan yega pa por a dere. F. tabata number 24 riba e lista di morto den trafico.
Pa un descuido di un cria, un criatura di 4 aña a bira e di 25 morto den trafico,
Ponton, 27 di oktober
Dialuna 27 di oktober den careda di 5 or di atardi a sosode un accidente hopi tristo. Esaki a pasa riba e caminda di Oranjestad pa Noord na altura di Ponton, un criatura di 4 aña a wordo alcansa pa un auto y a fayece. Dialuna atardi e señora cu ta traha cu e famia a dicidi di bay cana cu e criatura canto di caminda na Ponton, na dado momento e mucha a tira un piedra y a core bay su tras, e la subi caminda net na momento cu tabata biniendo un auto . E chauffeur no por a haci nada mas y a dal e. Den un estado hopi critico e criatura a wordo transporta c pa hospital y un rato despues cu e criatura a yega hospital e la fayece. E criatura tabata yama D. Arends y a bira e di 25 morto den trafico di Aruba.
Hoben(17) a fayece casi 3 dia despues cu auto a dal ‘e
Hooiberg, 25/28 oktober di 1970
Diaranson 28 di oktober R. P. Dubero, un hoben di 17 aña a fayece, despues cu diadomingo e la wordo alcansa pa un auto riba e caminda di Oranjestad pa Santa Cruz na altura di Hooiberg. E hoben den un estado critico a wordo transporta cu ambulance pa San Pedro Hospital y despues di a lucha casi tres dia pa su bida, diaranson e la perde e bataya y a fayece. E hoben di 17 aña na altura di Hooiberg a crusa e caminda principal y a wordo alcansa pa un auto cu tabata biniendo cu velocidad hopi halto. E impacto tabata hopi fuerte y e hoben a keda seriamente herida, cu urgencia e la wordo transporta pa hospital y diaranson a fayece. Diahuebs merdia a hib’e na su lugar di ultimo sosiego. E hoben Dubero aki a bira e di 26 morto di trafico na Aruba.
Pa falta di dunamento di preferencia, su señora a fayece
Mahuma, 29 oktober 1970
Diahuebs 29 di Oktober, den careda di 4’or y mey di atardi, riba e caminda principal di Mahuma, a sosode un accidente fatal, den cual e sra. V. Maduro Britten a fayece. E casa di e señora tabata tras di stuur y señora Maduro Britten tabata sinta na banda. Na dado momento su casa no a ripara na tempo cu e auto su dilanti a brake pa bay lora, y pa evita di dal su tras, e casa a spanta y a hala e stuur full na su man robes, net na momento cu tabata biniendo un otro auto for di direcion contrario. E impacto frontal tabata asina fuerte cu e señora a keda seriamente herida. E la wordo transporta cu hopi urgencia p hospital, caminda algun rato despues e ta fayece. E Señora Maduro Britten tabata tin 36 aña di edad y ta e di 27 morto den trafico di 1970. Den menos cu un siman e trafico insigur di Aruba a cobra 4 bida.
Hoben Italiano (18) a fayece un accidente fatal, e hunto cu un colega tabata den un auto chikito y a lora dilanti di un autobus
Pos Chikito, 31 oktober
Diasabra 31 oktober 1970, e trafico insigur di Aruba a exigi bida di un otro hoben, e biaha aki tabata trata di un hoben di 18 aña, di nacionalidad italiano. Diasabra den oranan di atardi dos homber hoben italiano cu tabata traha na SAIPEM, tabata den nan auto chikito y dilanti di ex Baby Bakery na Pos Chikito a subi caminda pa bay bira links y esun tras di stuur no a pone bon tino riba caminda y a lora net dilanti di un autobus cu tabata biniendo cu velocidad halto. E impacto tabata hopi fuerte, cu e la manda e auto chikito cu e italianonan den dje contra un palo lus. E dos italianonan a keda seriamente herida. Un di e italiano nan tabata M. Sorbellini di 18 aña su situacion tabata hopi critico y a wordo transporta cu sumo urgencia pa hospital mescos cu e chauffeur di 22 anja A. SCanu. Den e autobus tabata tin 4 persona cu a keda herida. Diasabra den oranan di anochi M. Sorbellini a fayece. Prome cu e curpa lo a wordo hiba Italia cerca su famia pa nan por despedi di dje y hibe na su ultimo luga di sosiego. A haci un despedida pa M. Sorbellini, na Aruba. Sorbellini ta e di 28 morto den trafico di 1970.
Dos ruman ta accidenta cu brommer y un ta fayece.
Santa Cruz, 04 november 1970
4 November 1970, Na altura di Club Estrella, dos ruman, F. cu B. Geerman tabata riba un brommer. Aparentemente nan tabata biniendo cu velocidad halto y no a ripara na tempo cu e auto nan dilanti a caba di baha un persona y net a cuminsa core poco poco. E manehado di e brommer no a haya ni tempo pa primi brake y e brommer a bay dal masha duro contra e parti robes patras di e auto. Ambos ruman a keda gravemente herida. Lamentabelmente cu un rato despues cu nan a yega Hospital a drenta e noticia cu B. a fayece y su ruman a tambe su situacion tabata critico. B. tabata tin 18 aña di edad y tabata biba na Cashero. E la bira e di 29 morto den trafico na 1970.
Tres accident casi pareu, na Santa Cruz, Kibaima y Savaneta, dos victima a keda seriamente herida y esun di Savaneta a fayece,
Savaneta, 08 y 09 november 1970
Den oranan tempran di diadomingo anochi a sosode 3 accidente, di cual dos tabata hopi serio, un na Savaneta, un Santa Cruz y Savaneta , tur tres victima a wordo alcansa pa auto. E prome tabata e accidente mas serio, esaki a sosode na Savaneta, e peaton F. Paskel di 31 aña biba na Savaneta a wordo alcansa pa auto riba e caminda principal di Savaneta, e meneer Paskel den un situacion critico a wordo transporta pa hospital. E chauffeur di e auto no a para y a sigi core, esaki pasobra e tabata burachi. Mas laat den oranan di anochi e chauffeur a bay entrega su mes na warda di polis na San Nicolas. Pa motibo cu e tabata bou influencia y e la djis haya un cuarto gratis pa pasa e anochi. Lamentabelmente den oranan di dialuna mainta famia a haya e noticia cu F. Paskel a fayece y a bira e di 30 morto pa anja 1970. Mientras polis tabata atendiendo cu e accidente na Savaneta, ta drenta un otro informacion cu auto a dal un persona na altura di e brug di Santa Cruz. E meneer di fam Kock a crusa caminda y a wordo gedal pa un auto, e la keda seriamente herida y a wordo transporta cu urgencia pa hospital. Mientras cu polis tabata ocupa cu e accidente na Santa Cruz ta sosode un otro accidente na altura di De Veer drive in Theater, pero no tabata di gravedad, compara cu e dos accidentenan anterior.
Den e mesun temporada aki compara cu Corsou, Aruba tabata tin 30 morto den trafico y Corsou un isla mas grandi cu mas auto y mas habitante tabata tin net mita cu ta 15 morto den trafico. Den e tempo ey Corsou nunca a conoce un cantidad grandi asina di morto den trafico.
E gezaghebber di e tempo ey Sr. Oscar Henriquez tabata hopi preocupa y den un programa di Television na November, e la dirigi su mes na e pueblo di Aruba, cu hopi enfasis a papia di e accidentenan y e insiguridad den trafico, asina mustrando potretnan di e accidentenan serio cu a sosode durante e aña. E la pidi pa tur hende bira mas responsabel den trafico. Sr. Henriquez a informa cu e aña anterior a instala un commision yama Wegenverkeersverordening banda di e esey tambe a instala e Vereniging Veilig Verkeer Aruba. E organisacionnan aki lo mester a cuminsa prepara un programa pa cuminsa concientisa e pueblo di tur loke por haci e trafico bira mas sigur na Aruba. Den e plan tabata poni cu lo bin cu patruyananan especial, pero tambe e la splica cu no tabata tin suficiente polis. Henriquez a papia di cambionan cu nan a cuminsa haci caba, relaciona cu chauffeurnan cu ta core bou influencia y ocasiona accident, sin pordon y no manera prome cu tabata hopi soepel, kita rijbewijs y no ta debolbe back, ni pa trabou. E persona mester a pensa bon prome cu a subi tras di stuur ora e tabata burachi. Otro cambio cu nan tabata boga p’e, ta pa stop cu cuenta di djis parti boet of kita rijbewijs, pero bin cu castigonan mas pisa, por ehempel mas castigo di prison. Tambe e gezaghebber a pidi e gobierno di e tempo ey pa cuminsa drecha e camindanan y pone mas lus di caya, a pidi pa verkeersdrempels y zebrapadnan pa hende por crusa caminda sigur. Tambe E la pidi e Minister di Husticia di e tempo ey pa bin cu 100 buitengewoon agent van politie pa Aruba, cuidadanonan cu por ta capacita pa haci esaki. Hopi propuesta a bin riba mesa, y minister lo a laga studianan.
Na 1970, 12 persona a fayece relaciona cu core auto bou influencia, 10 coremente iresponsabel, por ehempel pasa auto unda no ta permiti, core mas duro cu ta permiti etc. 8 persona cu a fayece door di a crusa caminda sin pone tino riba e trafico. Den e prome 10 lunanan di 1970, Aruba a conoce su record di morto den trafico cu tabata 30 morto, pero tambe 87 persona cu a keda gravemente herida, 309 persona herida den e accidentenan. Tambe e la pidi pa bin cu un ley pa prohibi brommer nan pa haci di mas desordo. E daño material di accidentenan den e prome 10 luna di 1970 tabata casi 1 miyon florin.
Dia 31 di December 1970 den e oranan final di e aña 1970, e trafico insigur di Aruba a kibra tur record, 30 morto den trafico y e golpi mas duro tabata e prome accidente fatal na Tanki Leendert den cual 4 persona a fayece. Cu e noticia aki Aruba a cera su aña. Sperando cu1971 lo a bira un aña cu hopi menos accidente fatal.
Fuente di algun potret: SKYLOOK OF ARUBA by Wim ter Hart
Fuente: anonimo plus Amigoe di Korsou