Azeta di pisca, rico na acidonan vet Omega-3 manera EPA y DHA, ta ofrece beneficionan significativo pa salud. Estudionan ta mustra cu e por baha e riesgo di malesanan cardiovascular, mehora e maneho di diabetes door di aumenta sensibilidad pa insulina, y impulsa salud mental door di sostene funcion di celebro. Adicionalmente, suplementonan di azeta di pisca ta yuda reduci dolor di joints y baha e riesgo di malesanan di nier y piedra.
Kico ta azeta di pisca/ Fish oil
Segun e Instituto Nacional di Cancer, azeta di pisca ta deriva for di e tehidonan di pisca vet. E ta wordo considera valioso pa su contenido halto di acidonan vet Omega-3. E dos tiponan principal di contenido di Omega-3 den azeta di pisca ta acido eicosapentaenoico (EPA) y acido docosahexaenoico (DHA).
Mientras cu pisca natural manera salmou, macrel, tuna, haring y sardin ta contene cantidadnan halto di Omega-3, e suplementonan por yuda bo logra e consumo recomenda di e nutriente hunto cu beneficionan agrega.
Ata 5 motibo pakico bo mester añadi suplemento di azeta di pisca na bo dieta inmediatamente.
Ta reduci e risico di malesa cardiovascular
Un investigacion di 2025 publica den e New England Journal of Medicine, a haya sa cu suplemento diario di azeta di pisca a reduci casonan cardiovascular serio cu 43% den hende cu ta ricibi dialisis pa fayo di nier. Esakinan ta inclui ataca di curason, stroke, morto cardiaco y amputacion relata na problema vascular.
Ta mehora diabetes
Suplemento di azeta di pisca ta mehora sensibilidad pa insulina door di activa mecanismonan di señal di insulina den e curpa, segun un estudio di 2013 publica den The Journal of Nutritional Biochemistry. Ademas, nan tin un respuesta anti-diabetico door di baha glucose ora di yuna, baha nivelnan di hemoglobina glicosilada y mehora funcion di celnan di pancreas, segun un estudio di 2017 publica den Journal of Food Science and Technology.
Mehora salud mental
E cerebro ta e parti mas compleho pero vital di e curpa humano. Cuida su bienestar ta mescos importante. Azeta di pisca ta contene acidonan vet omega-3, cualnan ta necesario pa crecemento neuronal pa desaroyo y funcionamento di cerebro, segun un estudio di Nature di 1990. E ta alivia sintomanan di angustia, infelicidad, nerviosismo, impaciencia, cansancio cognitivo, tension y mas.
Ta reduci dolor di joints
Segun nos ta bira mas bieu, e articulacionnan y wesonan ta bira mas swak y ta mas vulnerabel pa daño y dolor. Den e caso aki, come e tipo corecto di cuminda saludabel y uza suplemento por yuda realmente pa haci e transicion aki uno sin dolor. A wordo constata cu suplementacion cu azeta di pisca (fish oil) ta reduci dolor specifico di osteoarthritis y e molestia den personanan cu obesidad, segun un estudio di 2020 den Rheumatology Advances in Practice.
Ta reduci e riesgo di malesanan di riñon
A wordo observa cu e acidonan vet omega-3 den suplementonan di azeta di pisca ta reduci e riesgo di malesa cronico di nier den adultonan en general, den un estudio di Nutrients na 2022. Adicionalmente, un otro estudio di 2024 publica den e Journal of Clinical Lipidology, a constata cu consumo habitual di azeta di pisca tambe ta baha e riesgo di piedra di nier nobo den personanan cu tin un riesgo genetico abou of intermedio pa piedra di nier.
Den e era di guera politico, inflacion economico, y soledad social, salud ta e virtud di mas grandi pa proteha.
Un dieta saludabel y suplementonan adecua por ta e maneranan mas facil pa sigura cu bo por bringa contra cualkier cos cu presenta den bo bida. Aunke esakinan kisas no ta e pilder magico, nan por ta un paso chikito pa un version di bo mes cu ta fisicamente y mentalmente mas fuerte.
Pero corda, trabou den ekipo ta locual ta hiba na gran exito. Pesey, ta vital pa combina e suplementonan aki cu bon ejercicio, descanso, maneho di stress y naturalmente consistencia.
Y cu cada scogencia consciente cu bo haci, manera añadi azeta di pisca na bo rutina, bo ta trahando keto keto na un futuro unda bo salud ta sinti menos manera un bataya y mas manera bo mayor fortalesa. Na final di dia, e habitonan cu bo ta crea awe ta bira e salud cu bo ta biba cune mañan—pesey scoge esunnan cu ta yuda bo florece.
Nota: E informacion proporciona den e articulo aki ta solamente pa proposito educativo y no ta intenciona como conseho medico. Semper consulta cu un profesional di salud cualifica prome cu cuminsa cualkier medicamento of tratamento nobo y prome cu cambia bo dieta of regimen di suplemento.
