ORANJESTAD, Aruba – 30 maart 2026: Directie Volksgezondheid (DVG) ta informa comunidad riba e importancia di conoce y reconoce e diferente sintomanan di malesanan transmiti pa sangura, manera Chikungunya y Keintura Geel, pa asina por tuma accion na tempo y preveni complicacionnan serio.
Mirando e situacion regional, unda e cantidad di casonan di Chikungunya y Keintura Geel ta mustra aumento den varios país den region di Sur America, ta esencial cu comunidad di Aruba ta bon informa y alerta.
Chikungunya ta un malesa viral cu ta wordo transmiti pa picadura di un sangura infecta. E sintomanan mas comun ta:
* Keintura diripiente
* Dolor fuerte den scarnirnan (articulacionnan, joints)
* Dolor muscular
* Dolor di cabes
* Cansancio extremo
* Rash (mancha riba curpa)
Den hopi caso, e dolor den articulacion por dura simannan of asta lunanan.
Keintura Geel (Yellow Fever) ta un malesa viral mas serio cu tambe ta transmiti pa sangura. E sintomanan inicial por ta:
* Keintura
* Dolor di cabes
* Dolor muscular
* Nausea y sacamento
* Cansancio
Den algun caso, e malesa por bira mas grave y causa:
Color geel den wowo y curpa (ictericia)
* Problema cu higra
* Sangramento interno
DVG ta enfatisa cu no tur sintoma lo ta mescos, pero tur sintoma sospechoso mester wordo tuma serio.
Kico bo mester haci si bo tin sintoma:
* Busca atencion medico di inmediato
* No automedica
* Informa e medico si bo a viaha recientemente
* Descansa bon y sigui instruccion medico
Accion rapido no solamente ta proteha bo mes, pero tambe ta yuda preveni propagacion di e malesanan aki den comunidad.
DVG ta recorda cu e forma mas efectivo pa preveni e malesanan aki ta combatiendo e origen: e sangura.
Yamado pa accion:
Cada ciudadano tin un rol importante den proteccion di salud publico. Elimina tur lugar unda awa por keda para:
* Basha awa di erco, drum y recipienten
* Bolter awa di scoter di mata regularmente
* Keda alerta pa cualkier acumulacion di awa rond di cas.
DVG ta sigui monitorea e situacion di cerca y lo continua informa comunidad di cualkier desaroyo relevante.
Bo Salud, Nos Prioridad
Pa mas informacion, like nos Facebook page Directie Volksgezondheid DVG Aruba, follow nos riba Instagram directie_volksgezondheid_aruba, sigui nos den WhatsApp Channel, bishita www.dvg.aw, yama 5224200 of manda email na [email protected]