WASHINGTON – Ora cu Homo sapiens a sali for di Africa, nos especi’e a topa cu poblacionnan Neanderthal cu tabata habita caba e teritorionan inmenso di Europa, Asia y Medio Oriente. Manera e presencia di DNA di Neanderthal den mayoria di hende di awendia ta mustra, cruzamento[interbreeding] a tuma luga, maske e circumstancianan ta keda sin ta duidelijk.
Investigacion nobo enfocando riba e cromosoma X, un di e dos cromosomanan sexual, den hende di awendia y, manera revela pa genomanan antiguo, den Neanderthalnan ta duna un bista den kende a participa den e unionnan prehistorico aki. E analisis genetico ta sostene e conclusion cu e fenomeno aki tabata principalmente impulsa pa sex entre hombernan Neanderthal y muhenan Homo sapiens.
E investigadornan a bisa cu ta desconoci dicon esaki a sosode, sea pa medio di preferencia pacifico di relacion sexual, forsa of algun otro situacion.
“E preferencianan di un of di tur dos partido por a produci e sorto di patronchinan aki, cu of sin e consentimento di e otro,” a bisa genetist Alexander Platt di e Perelman School of Medicine na University of Pennsylvania, co-autor principal di e investigacion publica diahuebs den e revista Science.
Cromosomanan ta structuranan den forma di hilo cu ta carga informacion genetico di cel pa cel. Cerca hende, muhenan ta carga dos cromosoma X – un hereda di cada mayor. Hombernan ta carga un cromosoma X hereda di nan mama y un cromosoma Y di nan tata. Pa e otro cromosomanan, tur hende tin dos copia – un di cada mayor, distribui igualmente entre e sexonan.
Mayoria di hende, cu excepcion di cierto poblacionnan Africano sub-Sahara, ta carga cantidadnan chikito – hopi biaha 1% pa 4% – di DNA Neanderthal door di gran parti di nan genoma pero tin poco of nada riba nan cromosomanan X. Africanonan ta e excepcion paso nan antepasadonan, cu a keda riba e continente, nunca a cruza cu Neanderthalnan.
E genomanan di tres Neanderthal a mustra un exceso di DNA Homo sapiens riba cromosomanan X, un patronchi opuesto na esun di hende di awendia y cu ta sugeri breeding entre homber Neanderthal y muhe Homo sapiens.
E investigadornan a examina tambe dato genetico di Africanonan di awendia cu no tin descendencia Neanderthal pa por sigui miho e fluho di genenan entre Homo sapiens y Neanderthalnan cu a cruza cu otro cuminsando for di 250.000 aña pasa. Un migracion mas recien di Homo sapiens a resulta den cruzamento adicional cu a yega su punto maximo alrededor di 47.000 aña pasa.
Cientificonan pa hopi tempo a asumi cu e ausencia di contribucion Neanderthal na cromosomanan X moderno tabata paso algun gen Neanderthal tabata biologicamente incompatibel cu Homo sapiens, causando problemanan serio di salud, y a keda elimina paso e descendientenan no a logra reproduci – e “survival of the fittest.” di Darwin.
Pero e abundancia di DNA di Homo sapiens den cromosomanan X Neanderthal a contradeci e idea ey. En bes di esey, e datonan genetico, e investigadornan a bisa, ta keda splica miho door di breed[sex] di hombernan Neanderthal y muhenan Homo sapiens, cu modelacion matematico confirmando cu e tendencia di breed aki por reproduci e patronchinan genetico observa.
SIMILARIDADNAN MAS AYA DI E ANATOMICO
Homo sapiens y Neanderthalnan tabatin un antepasado comun te cu mas of menos 600.000 aña pasa. E liña di descendencia despues a separa, cu Neanderthalnan evolucionando na Europa y Homo sapiens na Africa.
Neanderthalnan, cu a desaparece mas of menos 40.000 aña pasa, y Homo sapiens tabatin similaridadnan mas aya di e anatomico. Neanderthalnan, di un structura mas robusto y cu wenkbrauwnan mas grandi, tabata inteligente, creando arte y usando metodonan compleho di jag den grupo, obhetonan simbolico y kisas idioma papia.
E naturalesa di e interaccion ta dificil pa determina basa riba evidencia arqueologico y genetico, incluyendo si, por ehempel, tabatin hostilidadnan manera gruponan di asalto door di hombernan Neanderthal pa secuestra muhenan Homo sapiens.
“Nos no tin manera pa sa si esaki tabata un scenario di conflicto,” genetist di University of Pennsylvania y autor principal di e estudio Sarah Tishkoff a bisa, notando cu e interaccion por tabata pacifico.
“Pero nos tampoco no sa dicon e patronchi aki a sosode di mas muhe humano moderno (Homo sapiens) relacion sexual cu Neanderthalnan – sea tabata pa escogencia of nan a wordo forsa. Esaki ta loke ta haci’e asina fascinante, y ta spera cu algun dia kisas lo tin dato arqueologico y di fosil cu lo duna mas luz riba e interaccionnan entre Neanderthalnan y humanonan moderno.”
Na cierto momento despues di a plama door di Eurasia[Europa y Asia], nos especi’e a surpasa e Neanderthalnan grandemente den cantidad.
“Si bo considera cu por tabatin 10 pa 20 biaha mas tanto Homo sapiens den e area compara cu Neanderthalnan, e observacion cu nos tabatin te cu 5% di descendencia Neanderthal 30.000 pa 40.000 aña pasa ta sugeri cu ta completamente rasonabel pa kere cu simplemente tabatin asina hopi cruzamento cu nos a inunda e genomanan – cu Neanderthalnan no a desaparece mes, nan djis a bira parti di nos,” Platt a bisa.
“Ta un poco pret si pa pensa cu actualmente tin mas of menos seis biyon hende canando rond cu alrededor di 2% di genoma Neanderthal,” Platt a bisa. “Den e sentido cu esey ta equivalente na e cantidad di genoma di 120 miyon Neanderthal, y nan ta miho cu nunca.”