Enfoke riba adulto mayor y cohesion social – Aruba Native

Den continuacion di e agenda oficial di su bishita na Aruba, Su Mahestad Willem-Alexander a bishita e Centro di Bario y Deporte Dakota, caminda e a haya un encuentro special cu Fundacion Movemiento ta Bida, ganador di e prestigioso reconocimiento Appeltje van Oranje 2024.
Durante e bishita, Su Mahestad tabata acompaña pa Prome Minister mr. Mike Eman y Vice-Prome Minister di Gabinete AVP-Futuro Sra. mr. Gerlien Croes, kende hunto cu otro representante oficial a forma parti di e encuentro.
E bishita aki a pone enfasis riba e rol fundamental cu e fundacion ta desempeña den fortalecemento di cohesion social, cu un enfoke particular riba bienestar, participacion y integracion di adulto mayor den comunidad. Fundacion Movemiento ta Bida ta dedica na crea espacio unda adulto mayor por keda activo, conecta socialmente y contribui positivamente den sociedad.
Durante e encuentro, a presenta diferente iniciativa comunitario cu ta enfoca riba calidad di bida di adulto mayor, promoviendo actividad fisico, interaccion social y participacion comunitario.
Un aspecto importante di e bishita tabata e interaccion directo cu participante di e fundacion y representante di organisacionnan social, esnan cu diariamente ta traha pa fortalece e posicion di adulto mayor den comunidad. Den e Urban Pocket Park, Su Mahestad a haya e oportunidad pa conoce di cerca e impacto di e proyecto y e compromiso di esnan involucra.
E presencia di Su Mahestad, hunto cu e liderato di gobierno, a representa un reconocimiento significativo pa e trabou di Fundacion Movemiento ta Bida, cu a logra destaca tanto na nivel nacional como internacional pa su enfoke social y comunitario.
Cu e bishita aki, a resalta un biaha mas e importancia di cuida y integra adulto mayor como un pilar esencial di un sociedad solidario, inclusivo y cu respet pa tur generacion.