E aña aki lo ta e di 33 edicion di Festival di Buki, e tema di e aña aki ta “Vol Aventuur” , “Aventura na Granel.” E aña aki e cantica pa e festival di buki a wordo canta pa e rumannan Keily y Catia. E cantica yama Zap zap zieng. Tambe a produci un video di e cantica , esaki tabata den man di tata di Keily y Catia, cu ta Edward Silberie. E cantica pa e tema di e Festival di Buki di e anja aki a wordo skiribi pa Edward Silberie y Steve Andreas.
Valerie Figaroa coordinador di e Festival di Buki pa mucha 2025, a sigui splica cu pa e Festival di buki 2025, Biblioteca Nacional a haya un cooperacion special di NV ELMAR pa motibo cu ELMAR ta celebrando nan di 75 aniversario. Pa motibo di e celebracion aki NV ELMAR ta re-lansa nan mascota Chispito.
Chispito ta e caracter principal den e buki di e aña aki, cu tin como titulo Zap Zap Zieng. E buki ta encera e aventuranan di chispito. E buki a wordo skirbi pa e autora local Lilian Erasmus. E ilustracion a wordo haci pa Daniëlle Schothorst. E ta un buki di prenchi. E ta skirbi na Papiamento y na Hulandes.
E video musical tambe a involcra Chispito den un forma hopi creativo. E ta un video musical di cartoon animation, pa mucha. E video su intencion ta pa encurasha e muchanan pa lesa buki.
Audrey Croes di e Departamento di Relaciones Publica di NV ELMAR a splica cu nan ta hopi contento cu e momento ta yegando pa nan lansa hunto cu Biblioteca Nacional e Festival di buki 2025 y principalmente cu NV ELMAR su mascota Chispito cu lo bay forma parti di e Festival di buki. Chispito ta bay ta e caracter principal, e buki Zap Zap Zieng, ta encera e aventuranan na granel di Chispito y den e buki aki nos lo bay conoce ken ta Chispito. Chispito sigur ta un mascota amigabel, curioso y cu hopi energia. E aventuranan di chispito principalmente lo siña e muchanan e peligernan di coriente, pero tambe e importancia di siguridad di coriente.
E festival di buki 2025 ta cuminsa dia 02 di november y por spera Chispito durante e tournan na diferente scolnan. Tambe durante e festival di buki tin merdianan di lesamento di buki na Biblioteca. Enconexion cu ELMAR su 75 aniversario, ELMAR a mira e momento perfecto pa re lansa Chispito y ala bes pa colabora cu Biblioteca Nacional.
NV ELMAR ta gradici biblioteca nacional pa nan colaboracion.y ta invita tur famia, mayornan y muchanan pa asisti na e Festival di Buki 2025 y na e merdianan di lesamento di buki.