Hugo Carvajal a declara culpabel na Merca
E ex-spion Venezolano, Hugo Carvajal, conoci como “El Pollo” a declara cu e ta culpabel relaciona cu e caso penal na Merca contra di su persona. E la admiti di ta relaciona cu narco terorismo y traficacion di droga. E la admiti tambe di tabata tin arma, esaki segun e Ministerio di Husticia Mericano.
E ex-director di e Servicio di inteligencia Militar Venezolano cu e acusacionnan aki, ta core e riesgo grandi di keda cera pa resto di su bida den un prison na Merca.
crímennan cometi
E crímennan cu Carvajal a comete, a tuma luga durante cu e tabata director di e servicio di inteligencia Venezolano. Fiscalnan a bisa cu e lo a colabora cu militarnan Venezolano di alto rango “cu ta tabata manda cargamentonan grandi di coca pa Merca, esaki den colaboracion y cooperacion cu e gruponan di Guerillero di pais bisiña Colombia.
Hugo ” El Pollo’ Carvajal no ta un persona desconoci na Aruba, e lo tabata tin amista cu algun persona prominente na Aruba.
Na January 2014 Carvajal a wordo apunta como Consul Venezolano na Aruba. Pero oficialment nunca gobierno di Reino no a acepta e nombracion aki. Dia 22 di July 2014, e la wordo aresta na Aruba, pa motibo cu e tabata wordo busca pa Husticia Mericano. Na prome instante e lo mester a wordo extradita algun dia despues pa Merca. Pero e la bringa esaki usando abogadonan conoci di Aruba. Su aresto hopi lihe a trece un disputa riba nivel diplomatico entre Venezuela Aruba y Hulanda. Venezuela a exigi inmunidad diplomatico pa El Pollo, pero esaki no a wordo honra. Venezuela a cuminsa tuma represaya door di cera e espacio aereo for di Aruba y Corsou niun buelo no por a sali y ni yega riba teritorio Venezolano y tambe a menasa cu e lo prohibi e barconan di fruta trece, pa sali bay direcion di Aruba.
Na Aruba hues a dicta pa laga Hugo Carvajal den Libertad pero cu e mester bay mesora Venezuela back. Tambe e Minister Hulandes di relacionnan exterior di e tempo ey a laga declare persona “non grata” pa Reino Hulandes. E mesun atardi despues cu e la recobra su Libertad, avionnan priva Venezolano a bin buske y hibe back Venezuela.
Pa casi dies aña autoridad Mericano a perde El Pollo for di bista, prome cu Spaña a extradit’e na 2023. Na 2021 El Pollo a wordo aresta na Madrid, capital di Spaña. Aparentemente e tabata move rond disfrasa cu bigoti falso y peluca.
Carvajal, cu e apodo ‘El Pollo’ (òf ‘E Galiña’ na Papiamento), tabata un di e personanan mas poderoso di e regimen Venezolano. El pollo tabatin lasonan estrecho cu presidente Hugo Chávez y tabata un diplomático den e gobiernu di su susesor, Nicolás Maduro.
Carvajal a bisa e huesnan na April 2019 na momento cu e la wordo deteni na Spaña, cu ta un luna prome, e la sali for di Venezuela y despues di un biahe den boto di dies seis ora e la yega Republica Dominicana. For di eynan, e la tuma un avion cu destinacion Madrid pasobra su famia ta biba na Spaña.
Na Merca Carvajal a declara culpabel, e desicion aki di Carvajal ta uno hopi importante pa husticia Mericano. El Pollo lo a of lo bay coopera completamente y lo ta transparente cu Gobierno Mericano, dunando nan informacionnan hopi balioso, manera informacion di e bandanan y di personanan cu e tabata tin contacto cu nan den pasado, especialmente durante e temporada cu e tabata den e mundo di traficacion di droga y hopi mas. E motibo principal di su cooperacion lo ta, cu e lo por wordo recompense den futuro pa e Gobierno di Presidente Trump y por ta recobra su Libertad?
=
