Roma
Servicio di Inmigracion y Control di Douane (ICE, pa su siglanan na Ingles) lo manda personal pa apoya e operacionnan di siguridad di Estados Unidos durante e Weganan Olimpico di Winter na Milano-Cortina, cual ta programa pa cuminsa dia 6 di februari.
E agencia di inmigracion Mericano, kende su agentenan tabata involucra den por lo menos un tiroteo mortal na Minneapolis, a anuncia su participacion.
Confirmacion di e presencia di ICE den e evento deportivo a bini despues cu varios informe tocante esaki a causa alarma y indignacion na Italia.
“E ta un milicia cu ta mata… por supuesto cu nan no ta bonbini na Milano,” e alcalde di e ciudad, Beppe Sala, a declara na e radio Italiano diamars.
Un vocero di ICE a enfatisa cu “tur operacion di siguridad ta keda bao di e autoridad Italiano.”
E funcion di ICE na Italia
Fuentenan di e embahada di Estados Unidos na Roma caba a splica medionan Italiano cu varios agencia federal a participa den Weganan Olimpico anterior.
Sinembargo, no a keda cla si e agencia di aduana y control di inmigracion a yega di interveni directamente.
E comunicado emiti pa e agencia diamars ta splica cu “e Division di Investigacionnan di Siguridad Nacional (HSI) di ICE ta apoyando e Servicio di Siguridad Diplomatico di e Departamento de Estado di Estados Unidos y e pais anfitrion pa evalua y mitiga e riesgonan di organisacionnan criminal transnacional”.
E ta puntualisa cu “obviamente” e lo no ehecuta operacionnan di control migratorio for di Estados Unidos.
TENSION POLITICO
E gobernador di e region di Lombardia, Attilio Fontana, a trata di calma e situacion, sugiriendo cu lo desplega e agentenan di ICE na Italia pa proteha e vice-presidente Mericano, JD Vance, y e secretario di Estado, Marco Rubio.
Politiconan di oposicion -manera e senadora di e Movimento Cinco Estrela Barbara Floridia- a alega cu e silencio di e gobierno di e prome minister di derecho Giorgia Meloni tocante e asunto aki lo ofrece “mas prueba ainda di cobardia y obedencia pa cu Donald Trump”.
Desde e tempo ey, e minister di Asuntonan Interior a adopta un postura mas firme y a afirma dialuna cu “ICE lo no opera riba teritorio Italiano”.
Estados Unidos no a comunica un lista di e personal di siguridad, y su siguridad tabata garantisa pa e Estado Italiano, el a declara.
E alcalde di Milano, di centro-links, no a mustra di ta combenci.
“Mi ta kere cu e agentenan di ICE no mester bini Italia pasobra no ta sigur cu nan ta ahusta na nos forma democratico di garantisa siguridad,” Beppe Sala a declara na e radio RTL.
