MADRID – Investigadornan na Universidad di Granada na Spaña a desaroya un cornea artificial traha for di scama di varios sorto di pisca cu comunmente ta wordo haya den mercadonan, lo cual por bira un alternativa di costo mas abou pa transplantenan di donante pa malesanan serio di wowo.
E cornea – e capa transparente dilanti di e wowo – ta dificil pa drecha ora e ta seriamente daña pasobra e no tin adernan di sanger y tin un capacidad limita pa regenera. Malesanan serio di cornea sa wordo trata hopi biaha cu transplantenan di donante, lo cual por wordo limita pa e disponibilidad di organo y listanan di espera.
Cientificonan di e Grupo di Ingenieria di Tehu (Tissue Engineering Group) di e universidad y e instituto di investigacion biomedico ibs.GRANADA a bisa den un comunicado di prensa cu nan a crea implantenan di cornea cu scama di pisca cu tabata hopi biocompatibel, transparente y resistente.
“Debi na su origen, e producto aki ta masha accesibel, facil pa obtene y barata, y lo por yuda impulsa e industria local di pesca,” cientifico Ingrid Garzon a bisa, kende ta profesora di histologia[anatomia microscopico] na e universidad den zuid di Spaña y co-autor di e investigacion.
Maske testnan a indica cu nan por ta util pa reparacion y regeneracion di cornea, e tecnologia aki ta leu ainda di por wordo uza clinicamente den ser humano, pendiente di pruebanan cu hende.
E ekipo a bisa cu e material a produci bon resultadonan funcional den estudionan di laboratorio y den animalnan cu a ricibi e implantenan.
“Maske e transplantenan standard usualmente ta ofrece bon resultado, ta necesario pa desaroya metodonan nobo y efectivo di regeneracion cu no ta depende di donacion di organo, cual ta cuestion na listanan di espera,” Miguel Alaminos, kende tambe ta un profesor di histologia na e mesun universidad, a bisa den e comunicado.
Un articulo di 2016 revisa pa colega cientificonan di Universidad di Antwerp a haya cu corneanan artificial deriva di scama di pisca tabata biocompatibel cu ser humano.