Nemesio Rubén Oseguera Cervantes, ampliamente conoci como e lider di droga “El Mencho”, a wordo mata pa forsanan special mexicano diadomingo den e estado occidental di Jalisco, provocando violencia generalisa den henter e pais.
El Mencho tabata e co-fundador y lider di un di e organisacionnan criminal mas poderoso di Mexico, e Cartel Jalisco Generacion Nobo (CJNG), cual tabata conoci pa ultraviolencia y pa usa drone pa ataca su enemigonan.
E operacion pa mata El Mencho a wordo sigui pa oranan di baricada generalisa cu vehiculonan na candela – un tactica comun uza pa e cartelnan pa impedi movementonan militar.
El Mencho, di 59 aña, tabata hopi busca pa autoridadnan mexicano pa añanan, e persona mas busca na Mexico y un di esnan mas busca na Merca na momento di su morto. E Departamento di Estado di Merca a ofrece un recompensa di te cu 15 miyon dollar pa informacion cu ta hiba na su aresto, un oferta cu a wordo reitera na december 2024.
E CJNG a wordo acusa di trafica cocaina, heroina, metamfetamina y fentanilo pa Merca, y di a comete varios homicidio riba teritorio Mexicano. E administracion Trump a clasifica esaki como un grupo terorista stranhero.
Aunke su nomber no ta asina famoso manera e cartel di Sinaloa maneha pa e prisionero Joaquín “El Chapo” Guzmán, e cartel ta conoci na Mexico pa su arsenal enorme, atakenan riba militar Mexicano, y muestranan increibel di violencia.
Ken ta El Mencho?
El Mencho a lanta na Aguililla den e estado di Michoacan, biniendo di un famia pober cu tabata cultiva awacati. Na edad di 14 aña, el a cuminsa vigila plantacionnan di marihuana, prome cu el a inmigra ilegalmente pa e estado di California den añanan 1980.
El a wordo deteni y deporta varios biaha for di Merca riba cargonan relaciona cu droga, prome cu el a drenta e cuerpo policial local di Cabo Corrientes y Tomatlan ora e tabata den su trinta añanan.
Despues di a pasa un tempo den cuerpo policial, El Mencho a uni su mes na e Cartel di Milenio y a casa cu un di e ruman muhenan di e lider di e clan, Rosalinda Gonzalez Valencia. El a subi den e rangonan di e Cartel di Milenio – cu a uni forsa cu e Cartel di Sinaloa – prome cu e detencion y mortonan di su liderato a hiba na un division den e cartel, sigui pa un lucha violento pa poder.
Con el a subi den e rangonan?
E secto di El Mencho a sali victorioso den e lucha pa poder, y e grupo a cambia su nomber pa Cartel Jalisco Nueva Generacion.
El a sigura su posicion como lider di e CJNG durante e añanan 2010, lagando e organisacion crece pa bira un di e gruponan criminal principal na Mexico cu presencia den tur 50 estado. E Administracion pa Control di Droga di Merca (DEA) ta considera esaki mesun poderoso cu e cartel di Sinaloa.
El a bira e cara di algun di e actividadnan criminal mas mortal di Mexico, subiendo rapidamente riba e listanan di esnan mas busca di Mexico y Merca.
Pa ki crimennan e tabata wordo busca?
Na 2015, un intento pa captura El Mencho a termina cu miembronan di gang di e cartel tirando un helicopter militar abou cu un rocket launcher, matando nuebe oficial di ley.
El a wordo acusa varios biaha den e corte di districto di Merca pa e Districto di Columbia. E ultimo acusacion, na april 2022, a acus’e di distribucion di substancianan controla cu e proposito di importa esakinan pa Merca. Tambe a acus’e di usa armanan di candela durante y en conexion cu delitonan di traficacion di droga.
Con el a wordo mata?
El Mencho a wordo mata durante un intento pa captur’e, mientras cu su siguidonan a purba di bringa contra e trupanan Mexicano.
Departamento di Defensa di Mexico a bisa den un declaracion cu e ehercito a lansa un operacion den e parti zuid di estado Jalisco pa captur’e cu a involucra e Forsa Aereo Mexicano y forsanan special.
E cartel a contra-ataca, y den e confrontacion cu a sigui, forsanan federal a mata cuater miembro di e grupo criminal, y a herida tres otro, incluyendo su lider, kende a muri despues.
Tres soldad a wordo herida y dos persona a wordo deteni den e accion. Rocket launchers capas pa tira avionnan abou y destrui vehiculonan blinda a wordo confisca na e sitio.