Na Aruba, no ta actualmente so, cosnan ta pasa cu ta laga hende boca habri, pero antes tambe. E temponan aya, hopi cos tabata keda scondi, compara cu awendia. Esey ta pone cu, e ta dificil pa haya informacionnan mas amplio di varios caso. Tambe esnan cu a experienci’e hopi no tey mes mas, of no ta corda tur cos.
E storia di e historia aki, ta un poco cortico. E historia aki a sosode na aña 1963. Nos no conoce e famia y ni e cabayero, di e historia aki, un cos nos sa kiko y unda e la pasa, e la sosode den e bario di Pos Chikito y tambe cu ora e la sosode e yiunan tabata muchanan chikito tur tabata bou di 11 aña.
Diabierna 29 di maart 1963, un patruya di polis a wordo pidi pa bay na un cas na Pos Chiquito pa un asistencia hopi tristo y un situacion increibel. Na yegada na e adres, polis a bin topa cu e cas cera y niun hende na e cas, pero hopi lihe despues di un investigacion cortico, nan a bin haya sa e tristo realidad di e famia aki.
Tur cos a cuminsa na momento cu e homber di e mama di 5 criatura, (no ta conoci si e homber aki tabata tata di e muchanan, tata di algun di nan of tabata un homber cu e mama tabata bibando den cas cu ne. E homber lo a perde trabou y tabata sali di mainta te anochi busca trabou, pero e no tabata haya un trabou. Trabou na Aruba lo tabata scars e tempo ey. Asina dianan y simannnan tabata pasa bay y no a keda homber nada otro di tuma un oferta di trabou na Corsou y bandona su pareha.
E famia tabata consisti di e mama, e homber y 5 criatura, di cual e mas grandi tabata tin 11 aña mientras e mas chikito un baby.
Riba un dia e homber subi avion y a bay traha na Corsou. E mama a keda su so atras, cu su 5 yiunan chikito atras, tur dia e mester a percura pa nan come, nan bisti y bay scol. Esaki na dado momento lo a bira di mas pa e mama, e lo tabata tin miedo cu e homber conoce un otro muhe na Corsou y lubida riba dje y te hasta lo tabata tin sospecho cu e homber lo tin un amante na Corsou. E mama tabata hopi preocupa, e preocupacion pa su homber a bira mas grandi cu pa e muchanan.
Luna y simannan a pasa bay y e mama su temor a bira demasiado grandi, e miedo di perde su homber a sigui crece y tabata domina su pensamento y su curason.
Riba un bon dia pa ser exacto diasabra, dia 23 di maart 1963, e mama su cabes a boltea por completo y diripiente e la dicidi di cumpra un ticket y subi avion bay cerca e homber na Corsou.
E diasabra un rato prome cu e tabata cla pa subi avion, e la hiba un di e yiunan di mas chikito Casa Cuna y a lage eynan. E otro yiu chikito e la bay hibe na cas di un famia na Balashi.
E otro tres nan di 7, 9 y 11 aña, e no por a haya un hende pa tene nan y ora tabata pasando cu mester bay aeropuerto, den su desesperacion pa bay Corsou, e mama a tuma un desicion, cu un mama cu ta stima su yiunan nunca lo tuma. Algun minuut prome cu e ta subi avion. E la dicidi di cera su cas y manda e tres criaturanan di 11, 9 y 7 aña riba caya.
Ni den e cas e no a laga nan, pero a djis sacanan for di cas y mandanan riba caya, sin awa, sin cuminda y sin un dak riba nan cabes. Asina aki sin cu su consenshi a remorde e la subi avion y bay corsou lagando su yiunan desampara.
Anochi a cera y e tres muchanan a keda tristo bandona riba caya, nan tabata cana rond en espera di nan mama, pero shon mama tabata dushi di dje na Corsou. Un mama cu no por tabata tin stimacion pa su yiunan, cu no tabata interes’e mas, si su yiunan chikito a come, con y unda nan a drumi anochi, si algo pasanan, si nan bira malo, si nan ta tristo y mester consuelo y amor di nan mama. E muchanan pa algun dia a keda cana rond y sin por a come un cuminda drechi. E muchanan tabata haya hamber sin por a come algo, despues di algun dia cu nan tabata cana riba caya, na cierto momento un di e criaturanan no por a wanta mas y a dicidi di bay cerca un bisiña y a bise cu e tin hopi hamber. E bisiña tabata sospecha caba cu tin algo no ta klop cu e muchanan aki, pasobra nan tabata cana te den oranan laat di anochi riba caya, nan tabata tur sushi y pa algun dia nan tin e mesun paña sushi bisti.
E bisiña di bon curason mesora a prepara cuminda pa e muchanan y a pone nan baña y a duna nan paña limpi pa bisti. Na mesa e tabata combersando cu e muchanan y asina a bin saca afo, kiko e mama a haci cu su yiunan. E bisiña a dicidi di tene nan den su cas y mira pa nan, e tabata percura pa tur dia nan come, baña y bisti paña limpi. E bisiña a haya hopi duele di e muchanan y tabata mira bon pa nan. Diaranson e bisiña a haya un yamada for di Corsou y tabata di e mama di e muchanan. E mama a bis’e cu e no por mira mas pa su 5 yiunan y tambe cu e no lo bolbe bek Aruba y lo keda biba na Corsou. Esaki a pone e bisiña rabia masha hopi mes, mirando den ki situacion e la laga e muchanan atras. No a keda e bisiña nada otro di pone autoridad na altura di locual e mama calacuna aki a haci cu su yiunan.
Na e cas dimes polis no a topa cu niun hende, pero si a bin topa cu dos cacho den hopi mal estado, tur dos tabata hopi hopi flaco, sigur algun dia sin come.
E Polisnan cu a presenta na e cas, a scucha e criaturanan y tambe a papia cu e bisiñanan, nan a nota tur informacion y esaki pa haci mas investigacion.. Kiko enrealidad a wordo haci despues pa e muchanan aki na aña 1963, no ta conoci y si a acaso a haci of no a haci, no ta conoci.
Ken e señora y e 5 muchanan aki ta, nos no sa. Varios pregunta a keda sin contesta, Si e mama a keda cu e homber aki na Corsou. Con bida di e muchanan a sigui? SI bo persona por sa con e storia tristo aki a caba, laga nos sa.
