Minister encarga cu Salubridad, Asuntonan Social, Cuido di Adulto Mayor y Cuido di Adicto, drs. Wyatt-Ras a keda sorprendi cu reaccion di miembro di gobierno anterior Dangui Oduber riba ampliacion di e Lista Positivo di Medicina pa henter pueblo di Aruba. El a hasta yama esaki como show politico y cu ta pronk cu pluma di otro. Segun Wyatt-Ras e actual parlamentario ainda ta kere cu e ta minister y mescos cu su partido por tira santo den wowo di pueblo.
Ta desde april 2021 e Lista Positivo di Medicina a ser austerisa, pero dor di critica fuerte di pueblo y fraccion di AVP, especialmente sr. Eman y Wyatt-Ras den Parlamento, e ex-minister Dangui Oduber a haya su mes obliga di hala su decision aden net prome cu eleccion y bai bek na uso di e Lista Positivo di Medicina sin cambio.
Despues cu eleccion tabata na aña 2021, e minister na mei aña 2022 a insisti cu su medida y asina Parlamento a ricibi e Landsbesluit, fecha dia 16 di mei 2022, di austerisacion di e Lista Positivo di Medicina un biaha mas. Dicho lista austerisa a bin na vigor despues cu el a keda pa 2 siman na Parlamento, manera ley ta stipula. Hunto cu esaki gobierno a introduci diferente otro medida, cualnan a baha e poder di compra di cuidadanonan drasticamento. E medida den cuido di aña 2020 tabata di 5 miyon pa aña sinembargo Dangui y su gobierno a dicidi cu e medida aki ta di 5 miyon pa luna cu a duna nan 60 miyon pa aña. Esaki no ta Wyatt-Ras ta bisa sino miembro di Aruba den CAft na su salida di CAft.
Hasta den e relato anual di Raad van Advies di aña 2023 a trece padilanti e deterioro social di nos pueblo a consecuencia di e medidanan drastico, entre nan esun di e lista positivo. Esey tampoco no a molestia Oduber.
Pueblo tabata sclama pa un cambio. Den nos programa di partido nos tin como prioridad pa hisa e suma di pension pa nos grandinan y duna pueblo su remedinan bek. Pues no ta nada di pronkia cu pluma di otro sino pronkia cu nos propio metanan y pluma nan. Pesey asina cu nos a drenta den gobierno comienso di april a manda pidi un advies y e advies aki a drenta dia 28 di april pa coloca cu un total di 129 medicina ariba e lista, cual lista a bin na vigor entrante prome di mei 2025. A consulta cu profesionalnan riba e tereno di cuido pa asina tin un miho resultado. Ta trata medicina pa hala rosea, pa cuero/dermatologia, stoma, barica, metabolismo, pa disturbio di zuur, pa spier, weso, nervio, epilepsia, hormona, wowo, orea, etc.
Cu dolor sr. Dangui Oduber y su coleganan por a tuma nota cu den 30 dia di gobernacion loke nan no a kere cu ta posibel a keda realisa. Ta pesey awor e ta core reacciona.
Dangui a drumi y laga salud di nos pueblo na caya.
Den e advies di Conseho Consultativo riba e lista positivo di 2022 ta cuestiona si a investiga e consecuencia di austerisacion di lista positivo riba salud di nos pueblo. Tambe cu si e medida aki tin suficiente beneficio financiero.
Dangui ta menciona den su entrevista cu tabata un decision dificil pa tuma pero dia 17 di december, ya despues di eleccion na juni a tuma decision pa exonera pensionadonan. Esaki ta e afscheidscadeau cu kier a duna pensionadonan pa pidi despensa pa a daña nan salud y ranca placa for di nan cartera. Aki por mira e diferencia. Nos di AVP-Futuro no ta discrimina, sino ta implementa accesibilidad di remedinan pa un y tur sin distinction.
Esaki ta cuadra cu meta principal di AZV, cual entidad a ser implementa na aña 2001. E Algemene Ziektekosten Verzekering cu ta conta pa TUR cuidadano di Aruba ta haci posibel cu nos pueblo tin acceso na cuido medico cualitativo y cu e ta accessible pa un y TUR. E vision e tempo ey di ex-prome minister Henny Eman ta valido te dia di awe. Un biaha mas pabien na pueblo di Aruba cu a haya su remedinan bek den pakete di cuido.
