Oranjestad – Awe, Aruba a uni na e comunidad mundial pa conscientisa riba e Dia Mundial di Personanan cu Limitacion, un dia declara pa Nacionnan Uni. E dia aki ta fungi como un momento di reflexion y accion, resaltando e derechonan, talentonan y oportunidadnan igual cu mester ta accesibel pa tur hende, sin importa e habilidad fisico of cognitivo.
Diaranson mainta, Minister di Turismo, Labor y Transporte mr. Wendrick Cicilia, CEO di Aruba Ports Authority, Marc Figaroa y Caroll Kock di Trampolin pa Trabao a firma un MoU pa brinda un sosten financiero na Trampolin pa Trabao y alabes a entrega un kiosco situa na Welcome Plaza pa asina e hobennan por participa productivamente den nos comunidad.
Aruba ta un comunidad diverso unda creatividad, talento y habilidad ta biba den cada ciudadano. Nos adultonan y hobennan cu discapacidad ta contribui di un manera significante na nos sociedad y nos economia, ta nos responsabilidad comparti pa garantisa cu cada persona tin e oportunidad pa participa debidamente.
“Awe nos ta destaca cu nos maneho, legislacion y “overheidsbeleid” mester sigui evoluciona pa garantisa participacion economico y social pa tur hende”, asina Minister Wendrick Cicilia a expresa. E mandatario a continua bisando cu: “Iniciativanan manera One of A Kind Cafe situa na MFA Paradera ta demostra nos cu inclusion no ta un lema sino un realidad di bida. Nos hendenan kier participa, sinti nan mes aprecia y haya e oportunidad pa demostra cu ningun limitacion por stop nan creatividad of habilidad.”
Creando trayecto pa empleo
Un prioridad central di Ministerio di Labor ta pa fortalece intermediacion laboral y crea trayectonan sostenibel pa empleo pa esnan cu ta enfrenta bareranan pa drenta den e mercado laboral. Proyecto manera Trampolin pa Trabao ta hunga un rol esencial door di sostene e personanan cu autismo, down syndroom of limitacion fisico pa nan por tin acceso na oportunidadnan laboral. “Discapacidad no ta defini loke un persona por of no por haci. Igualdad di oportunidad mester ta accesibel pa tur hende. Trampolin pa Trabao ta un partner esencial pa yuda construi un mercado laboral inclusivo cu nos pais merece”, asina Minister Wendrick Cicilia a declara.
Mas cu’n espacio laboral: Un colaboracion turistico
Ministerio di Tursimo den colaboracion cu Aruba Ports Authority (APA), tambe ta tumando pasonan concreto pa integra inclusion den e experiencia di e bishitante. Welcome Plaza, cu pronto lo conoce un renobacion, lo bira un espacio caminda e turistanan por conecta di un manera significante cu e comunidad di Aruba.
Pa medio di Trampolin pa Trabao, e personanan cu limitacion lo mustra y bende nan artesania y recuerdonan traha na man na e bishitantenan di crucero. Oficialnan asigna di informacion lo guia e turistanan na e kiosco aki, garantisando visibilidad, compromiso y oportunidad economico.
“E iniciativa aki ta trece nos un stap mas cerca di e comunidad inclusivo cu nos ta anticipa, uno caminda adulto y hobennan cu limitacion fisico of cognitivo por participa completamente y haya acceso na oportunidadnan cu ta destaca nan balor”, tabata palabra di Minister Cicilia.
