Teheran, Iran:
Despues cu Merca a lansa bomnan pisa y a comete distrucion na tres di e instalacionnan nuclear na Iran, Presidente di Merca a tene un conferencia di prensa, pero di otro banda, e banda di Iran, no tabata tin niun reacion referente e atakenan di Merca riba e instalacionnan nuclear cu ta hopi importante pa e pais.
E lider supremo di Iran Ayatollah Ali Khamenei, no a duna niun statemente riba e sucedido aki. Algun dia pasa si e la avisa Merca cu si Merca drenta den e guera contra Iran, lo ta bay tin consecuencianan y cu e daño cu nan lo haci Merca lo hopi mas grandi cu e daño cu Merca a haci na Iran.
Ministro di Relacionnan Exterior di Iran a avisa Merca, cu e atakenan aki lo tin consecuencianan pa semper.
Mientras cu e lider supremo ta keto un consehero prominente di e lider supremo di Iran a pidi pa ataca e barconan di guera di Marina Mericano cu misil y tambe pa cera Strait of Hormuz, un ruta crucial pa transporte di petroleo.
“Despues di e atake di Merca riba e instalacion nuclear di Fordow, awor ta nos turno,” asina Hossein Shariatmadari, hefe di redacion di e corant extremista Kayhan, un persona conservativo y bon conoci, cu anteriormente a identifica su mes como e “representante” di Lider Supremo Ayatollah Ali Khamenei.
Un mensahe di Telegram di Kayhan pa Shariatmadari bisando: “Sin duda, ni tarda, como un prome paso nos mester lansa atake di misil riba e flota naval mericano cu ta estaciona na Bahrain y simultaneamente cera strait di Hormuz pa barconan mericano, britanico, aleman y frances,”
E mensahe a termina cu un citacion for di e Koran, ku ta bisa: “Mata nan unda ku bo topa nan.”
