Diamars atardi a tuma luga un encuentro publico na Parlamento cu Ministernan Eman, Wever y Croes riba e Rijkswet. Durante e encuentro Minister Eman y Wever na un manera serio a splica y contesta preguntanan haci pa Parlamentarionan. Esun cu si a laga hopi di desea ta Minister Gerlien Croes cu no por a contribui positivamente na e reunion y a tuma tempo valioso pa sinta haci politikeria y na cierto momento a bolbe recuri na e topico di retraso den jaarrekening pa asina por purba difama e trabounan haci pa ex Minister Maduro cu awo ta Parlamentario.
Pa desbarata e ponencia eroneo di sra. Croes, Parlamentario Edgard Vrolijk a haci pregunta na Minister Wever pa asina bolbe splica Parlamento ta kico ta causando e retraso den Cuenta Anual of jaarrekening di Aruba. Sr. Wever a pasa palabra pa Director di Departamento di Finansa (DF) kende na placa chikito a splica Parlamento kico ta e motibonan cu desde aña 2020 tin retraso den compila y presenta e jaarrekening di Pais Aruba na Parlamento.
E director a splica cu e lockdown na comienso di e pandemia a stroba e trabounan pa cera administracion di aña 2019 y Aruba diripiente mester a cuminsa manda diferente raportahe nobo na Hulanda pa por haya yudansa financiero, locual a trece tardansa di 6 luna cune den e trabounan necesario. Despues e aplicacion GFS One den cual ta hiba e administracion financiero di Pais Aruba a confronta problema y e compania di Hulanda encarga cu e software a tarda basta pa por a haya e fayo y despues a tuma tempo pa por a drecha esaki, locual a pone cu un aña di trabou a bay perdi. Na comienso di aña 2021 tambe DF a perde dos empleado cardinal cu a pone cu a bin retraso grandi den e administracion financiero y tambe den e compilacion di e jaarrekening. A dura hopi pa por haya empleado nobo y ta te na aña 2024 ta logra yena e cuponan vacante den cuadro di ehecucion di proyectonan di Landspakket. Pesey ta den aña 2024 mayoria trabou a wordo haci na unda a presenta jaarrekening 2019 na Parlamento caba, jaarrekening 2020 ta na Algemene Rekenkamer caba y ta trahando riba jaarrekening 2021 na e momentonan aki. Pa fin di aña 2025 ta spera di por a ‘haal in’ ful e retraso. Fuera di esaki ta importante pa splica cu den cuadro di jaarrekening Central Accountantsdienst tambe ta bezig ta recomenda cambionan cu ta necesario pa e jaarrekening di aña 2026 por wordo certifica, un otro proyecto grandi na unda ya caba tin 320 recomendacion pa mehoracion cu mester wordo implementa.
Cu e splicacion amplio aki Minister Gerlien Croes a keda bergonsa pa e berdad. Parlamentario Xiomara Maduro ta spera cu e mandatario aki ‘once and for all’ por stop di recuri na e hacimento di politikeria aki cu retraso di jaarrekening, ya cu di e modo eynan ta e profesionalnan Arubiano na Departamento di Finansa, Central Accountantsdienst y Algemene Rekenkamer, sra. Gerlien ta sinta chercha cu su mofa politico, y nan no merece e falta di respet eynan. Minister Gerlien mester compronde cu e retraso tin su motibonan valido y no tin di haber cu fayo of falta di transparencia di ex Minister Maduro di Finansa.
