Oranjestad-Aruba
Parlamentario Otmar Oduber di e fraccion di PPA tin mas di 100 dia ta wardando pa Presidente di Parlamento yama un reunion pa forma un frente nacional y para p’e derechonan di pais Aruba. Segun Oduber, ta falta di integridad y responsabilidad cu Parlamento mes ta viola nan propio reglamento di ordo, unda ta poni claramente cu dentro di 30 dia cu un parlamentario pidi pa un reunion publico, esaki mester haya su atencion y worda agenda. Sinembargo e propio Presidente di Parlamento no ta sigui su reglamento di ordo y ta contradeci e actitud di ta imparcial den su funcion.
“Desde 1 di mei interes a subi di 5.2% pa 6.9% y esaki lo keda core te ora nos hiba e discusionnan pa yega na un ley nobo di Rijkswet, cual lo tuma lugar na luna di october/november, segun fecha cu e gobierno actual a indica”, e parlamentario a subraya. For di un principio PPA ta boga pa un frente nacional y a haci un suplica na tur politico, pa laga nan diferencia di opinion personal un banda y forma un bloke di union como e organo di mas halto di Aruba.
E pregunta critico: “Nos lo keda baas den nos mes cas?” cu e parlamentario a haci na Prome Minister Eman no a ricibi contesta directo. “Ta preocupante y lamentabel cu no kier papia riba e topico aki y ta djis keda focus riba e placa cu e accion aki lo trece. E lucha cu nos grandinan a inicia den e añanan 40 – 50, di cual awe nos ta disfruta di nos Status Aparte for di 1986, ta na peliger y ta mustra cu nos ta bayendo den e direccion, unda cu materialismo ta vence idealismo, en bes nos para pa nos derecho constitucional cu nos tin den Reino y e derecho cu nos tin pa haya ayudo tambe conforme articulo 36 di nos constitucion” tabata Oduber su expresion.
Oduber ta di opinion cu e parlamento aki ta refleha uno di ta disfuncional y sigur no tin democracia den parlamento. “Nan kier silencia fraccion di PPA, door di no laga nos participa na e reunnion di IPKO na Hulanda, sinembargo e siman aki, nos a reuni cu e mesun hendenan y instancianan di Eerste y Tweede Kamer na Aruba si. Esaki ta mustra mas un accion cu kier evita pa PPA trece su pensamento critico dilanti tocante Rijkswet,” Otmar a finalisa bisando.
