E jackpot di Powerball awor aki ta na un balor estima di $1.6 biyon, locual ta haci’e un di e premionan di loteria mas grandi den historia di Merca, oficialnan di Powerball a bisa diadomingo.
Ningun ticket a cuadra cu tur e seis numeronan ganado di diasabra—e bolanan blanco 4, 5, 28, 52, 69 y e Powerball cora 20. Esaki ta prepara e caminda pa e di cinco jackpot mas grandi den historia di Merca pa e sorteo di awe dialuna, segun un comunicado di prensa di Powerball.
E jackpot di mas grandi na Merca tabata $2.04 biyon na aña 2022. E ganado a cumpra e ticket na California y a opta pa un pago unico di $997.6 miyon.
E probabilidad pa gana e jackpot di dialuna, cual ta e di cuater mas grandi den historia di Powerball, ta 1 den 292.2 miyon, segun Powerball.
E ganado por opta pa un pago unico estima na $735.3 miyon of un premio den forma de anualidad estima na $1.6 biyon. Tur dos opcion di premio ta prome cu impuesto.
E opcion di anualidad ta ofrece un pago inmediato sigui pa 29 pago anual cu ta aumenta cu 5% cada aña, segun Powerball.
Powerball ta disponibel na 45 estado, Washington, D.C., Puerto Rico y Virgen Islands Mericano. E ta bou di supervision di e Multi-State Lottery Association, un grupo sin fin di lucro cu ta consisti di loterianan estatal. Ganashi di benta di e ticketnan ta wordo uza pa e estadonan pa apoya educacion publico y otro servicionan.
