RAIZ CU VISION NOBO, LIDERAZGO FUERTE Y UN DIRECCION STRATEGICO RENOBA – Aruba Native

Pafo di Parlamento, RAIZ ta cla pa ta e bos di e mas di 10,000 votadonan cu awe no tin representacion den Parlamento di Aruba.
ORANJESTAD, 24 JULY 2025 – Despues di un periodo di reflexion cu proposito, despues di eleccion na 2024, RAIZ ta orguyoso di por anuncia su regreso den e panorama politico di Aruba, respalda pa un vision nobo, liderazgo fuerte y un direccion strategico cu ta posiciona e partido pa logra impacto a largo plaso.
Den e ultimo 6 lunanan despues di eleccion, RAIZ a scoge un caminda di reflexion, no pa retira, sino pa tuma e responsabilidad di reevalua, reorganisa, y fortalece su vision pa e futuro di e partido pa por sirbi Aruba. E siman aki, durante e prome reunion di miembro (algemene ledenvergadering), RAIZ a drenta su capitulo nobo, transforma di un plataforma, pa un partido cu un mission y structura fuerte.
Liderazgo Renoba, Raiznan mas Fuerte
Rondona pa miembronan di RAIZ, unanimamente a apunta Sr. Anthony Martina como Presidente nobo di e Hunta di Directiva di RAIZ, sucesor di Sr. Jeffrey Matos kenda a sirbi como Presidente di 2022 te cu 2025 y cu awo ta muda pa Hulanda. Partido RAIZ kier extende un danki di curason na Sr. Jeffrey Matos pa su dedicacion, compromiso y pasion den e ultimo añanan. Tambe uninanimamente a instala e directiva nobo kende hunto cu Sr. Martina y lo dirigi RAIZ den su proximo capitulo.
Na mes momento, RAIZ ta confirma e reeleccion di Sr. Ursell Arends como lider politico di RAIZ. Cu un reputacion fuerte di lidera cu integridad berdadero y innovacion durante su tempo den gobierno, Arends ta orguyoso di e logronan cu a cumpli cune cu awe ta sirbi como fundeshi pa otro sigui traha riba dje. Decisionan dificil, pero cu bienestar di Aruba semper na pecho. Esakinan ta entre otro y no limita na;
– Cera dump di Parkietenbos despues cu pa mas di 70 aña a impacta e salud di e bario y su hendenan.
– Lansa campaña nacional di ‘Limpi Limpi’ cu e programa ‘Baki den Bario’ cu a wordo organisa 23 biaha den 2023 y 2024. Esaki a wordo amplifica cu e Dia Nacional di Limpiesa ‘Mi Bario Limpi’ cu mas di 1,000 boluntario.
– A introduci plan pa inclui mercado local organisa den e proyecto di Revitalicacion di San Nicolas pa benta y promocion di producto local
– A introduci proyecto di ‘Hardin di Alimentacion’ na 13 scol y diferente Centro di Bario cu awe ta disfruta di nan cosecha local. Esaki tambe a contribui na e produccion local cu a subi cu 400%.
– Prome biaha cu Aruba a conoce un Ministerio di Asuntonan di Adulto Mayor unda cu e instala un Commisie Ouderenzorg y a introduci proyecto Pasadia cu awo tin 4 habri na Aruba.
– Despues di añas di mal maneho a introduci oportunidad igual pa otorgamento di vergunning pa transporte publico.
– Cu un clima financiero hopi fragil a logra rescata Serlimar for di bancarota.
– Introduccion di www.publico.aw pa garantisa acceso y transparencia activo na trabou di gobernacion pa comunidad di Aruba.
– A propone Ley di Corporate Governance y tambe un Corporate Governance Code.
– Prome biaha cu Aruba a conoce un Ministerio di Naturalesa unda cu a introduci e concepto di ley di Derecho di Naturalesa y a introduci National Biodiversity Strategic Action Plan (NBSAP).
– A desaroya y introduci pa prome biaha un ontheffingsbeleid y a establece National Climate Resilience Council (NCRC).
– A haci inversionan grandi pa construccion di un centro nobo pa bienestar di animal na Kibaima cu pronto lo habri su portanan.
Y ainda falta. Sr. Arends ta cla pa sigui fortifica RAIZ y guia e partido den e proximo era di crecemento y logronan pa cosecha un pais unda cu ta reina abundancia y prosperidad real den su hendenan. E ta comprometi na hiba un gobernacion cu di berdad ta transparente y traha riba mas proyectonan cu ta beneficia nos comunidad a termino largo.
“Mi ta comprometi na Aruba,” ta comenta Sr. Ursell Arends, Lider, Partido RAIZ. “Ora un comunidad ta bini hunto y cera cabes pa logra un mihor bienestar pa su pais, e retonan ta bira posibilidadnan nobo y speransa ta nace bek.”
Arends ta sigui comenta,“RAIZ ta keda para pa su principionan y cu nos direccion strategico nobo nos no ta solamente fortalece nos compromiso na Aruba, pero tambe tuma un paso fuerte dilanti pa traha pa un futuro unda cu politica ta sirbi su hendenan cu integridad y transparencia – dos compromiso cu hopi ta papia di dje, pero tiki di berdad sa con pa hibe.”
“Mi a bin ta observa cu desde cu RAIZ a wordo funda, tawata cla cu no a funda pa solamente sostene algun ciclo di eleccion sino, RAIZ a wordo funda pa transforma con politica ta wordo hiba na Aruba”, ta comenta Sr. Anthony Martina, Presidente, Partido RAIZ.
Plan Strategico – Fortaleciendo 2025 – 2028
Despues di lunanan di trabou profundo cu Hunta di Directiva, candidatonan y boluntarionan, RAIZ ta cla cu su plan strategico – Fortaleciendo. Un plan di proyectonan pa reforma RAIZ di un plataforma pa un partido, y tambe reconecta e partido cu e pueblo di Aruba.
Durante e proximo simannan, RAIZ lo anuncia su serie nobo di diferente actividadnan pa conecta y combersa cu comunidad, Academia di Bon Gobernacion, Sunset Talks y Cunucu Café, cu ta oportunidadnan pa por skucha, colabora, y crea cu e comunidad di Aruba.
Cu e transformacion aki, RAIZ ta surpasa e cyclo electoral y ta tuma su rol a largo plaso como un forsa politico cu bista riba futuro y guia pa nos balornan.
“Nos no ta simplemente bolbe. Nos ta bolbe mas fuerte, mas sabi y conecta cu e pueblo manera nunca prome,” ta comenta Sr. Ursell Arends, Lider, Partido RAIZ.