Tribonnan banda di costa di Bahama’s, ta hayando droga manera remedi pa dolor, cafeina y cocaina den nan sistema. Esaki a sali na luz den un investigacion nobo di sanger cerca e animalnan marino aki.
Cientificonan a investiga sanger di 85 tribon rond di Eleuthera, un isla aleha den Bahama’s. Cerca 28 tribon di tres diferente sorto, a haya cafeina, remedi pa dolor contra inflamacion y droga den nan sanger. Tambe a haya rastro di cocaina den nan sanger. Esaki a sali na luz den un estudio publica den e revista di ciencia Environmental Pollution.
Mayoria di e tribonnan a wordo capta na mas o menos 6 kilometer for di e costa banda di un criadera di pisca inactivo cu ta popular cerca sambuyadonan, segun Natascha Wosnick, biologo na e Universidad Federal di Paraná na Brazil.
Segun Wosnick, coriente di awa ta hiba rastro di droga cu ta bin for di awa di riool of otro fuentenan riba e isla. Pero ta parce mas probabel cu e sambuyadonan mes ta e causa. “Esaki ta bin principalmente pasobra hende ta bay aya, ta orina den e awa y ta basha nan awa di riool directamente den lama.”
Pakete cu rastro di cocaina a wordo guli
E investigadornan a descubri por ehempel cu un Lemon Shark jong a test positivo pa cocaina. E concentracion tabata mas abao cu esun di e tribonnan anteriormente banda di costa di Brazil. E diferencia ta cu estudionan anterior a investiga tehido muscular en bes di sanger, den cual cocaina ta wordo descompone mas rapido. Droga ta keda presente pa mas tempo den tehido muscular, loke ta nifica cu e presencia den sanger ta indica un exposicion reciente.
Probablemente e tribon a guli un pakete cu rastro di cocaina. Segun e investigador, tin mas di e paketenan aki ta drief den e awa. “Tribonnan ta investiga cos door di morde den nan, y asina tin biaha nan ta drenta den contacto e cu droga”, Wosnick a bisa.
E investigadornan a descubri tambe cambionan den e metabolismo, pero ainda no ta duudelijk si esaki tin consecuencianan negativo pa e animalnan marino. Estudionan anterior cu goldfish ta mustra cu cafeina tin un efecto similar riba pisca meskos cu riba hende.
Segun e investigador, e descubrimientonan aki ta preocupante: Bahama’s ta wordo considera un paraiso limpi, mientrastanto e contaminacion kimico eyden, meskos cu plastic, ta plama tur caminda y hopi biaha ta wordo ignora.