BEIRUT/MIAMI/TEL AVIV/DUBAI – Presidente di Merca Donald Trump a bisa cu e no ta interesa den negocia cu Iran y a lanta e posibilidad cu e guera cu Iran lo termina solamente ora cu Tehran no tin un ehercito cu ta funciona mas of cualkier liderasgo cu a keda na poder.
Papiando cu reporteronan a bordo di Air Force One riba diasabra, Trump a bisa cu e campaña aereo por haci negociacionnan un punto discutibel si tur e lidernan potencial di Iran wordo mata y e ehercito Irani wordo destrui.
“Na un dado momento, mi no ta kere cu lo keda ningun hende kisas pa bisa ‘Nos ta entrega,’” Trump a bisa.
DISCULPA DI PRESIDENTE DI IRAN TA CAUSA SCANDAL
Israel y Iran a intercambia numeroso atake riba diasabra ora cu e guera di Merca y Israel contra Iran a drenta su di dos siman. E presidente di Iran a pidi disculpa na estadonan bisiña pa su atakenan riba facilidadnan di Merca den e paisnan ey, den un intento pa calma e rabia den henter e Golfo, pero esaki a lanta criticanan di e partidario- y lidernan conservador radical (hardliners) den su propio pais.
”Ami personalmente ta pidi disculpa na e paisnan bisiña cu a wordo afecta door di e accionnan di Iran,” Presidente di Iran Masoud Pezeshkian a bisa, urgiendo nan pa no uni nan mes na e atakenan di Merca y Israel contra Iran.
E a desmenti e demanda di Trump pa un entrega sin condicion di e Republica Islamico como “un soño,” pero a bisa cu su conseho di liderasgo temporal a acorda pa suspende atakenan riba estadonan cercano a menos cu e golpi of atakenan contra Iran origina for di nan territorio.
E comentarionan di Pezeshkian a causa un scual politico na Iran, loke a pone su oficina reitera cu e ehercito di Iran lo responde firmemente na atakenan for di basenan di Merca. Ali Larijani, secretario di Iran di e Conseho Supremo di Siguridad Nacional, a bisa na television di estado cu no tabatin ningun division entre oficialnan Irani tocante e maneho di e guera.
Departamento di Estado di Merca no a responde inmediatamente na un peticion pa comentario.
Saudi Arabia a bisa Tehran cu atakenan continuo di Iran riba e reino y su sector di energia por pusha Riyadh pa responde di e mesun manera, segun cuater persona familiarisa cu e asunto a bisa Reuters.
E gobiernonan di Saudi Arabia, Kuwait y Emiratonan Arabe Uni a reporta atakenan di drone di Iran den nan paisnan riba diasabra y diadomingo trempan cu diferente grado di daño pero sin ningun morto reporta. E Guardia Revolucionario di Iran tambe a tira riba forsanan Mericano na un base na Bahrain, segun medio di comunicacion di estado di Iran a bisa.
Na Merca, Cas Blanco a para pa awor un boletin di siguridad federal cu lo a adverti di un menasa mas halto pa Merca den bista di e conflicto cu Iran, un oficial di e administracion di Trump a bisa Reuters. Pero un evaluacion recien di inteligencia di Merca a adverti cu Iran y su representantenan “probablemente” ta representa un menasa di atakenan cu un obhetivo specifico (targeted attacks) riba Merca.
Na Oslo, e embahada di Merca a wordo alcansa pa un explosion diadomingo trempan, causando daño menor pero sin ningun herido, polis Noruego a bisa. Huma a wordo mira bay halto for di e area rond di e tereno di e embahada, testigonan a bisa e diario Noruego Verdens Gang. No tabata inmediatamente duidelijk kico a causa e explosion of ken tabata envolvi.
Explosionnan enorme a wordo scucha den partinan di Tehran, medio di comunicacion di estado a reporta, mientras cu Israel a bisa cu el a dal sitio y centronan di mando di misil Irani.
E atakenan di Merca y Israel a mata por lo menos 1,332 civil Irani y a herida miles, segun e embahador di Iran na Nacionnan Uni, Amir Saeid Iravani.
Forsanan Mericano probablemente tabata responsabel pa un atake aparentemente riba un scol di mucha muhe Irani cu a mata hopi mucha, oficialnan di Merca a bisa Reuters. Pero Trump, sin cita evidencia, a bisa reporteronan riba diasabra cu Iran tabata responsabel.
“Nos ta kere cu esaki a wordo haci door di Iran pasobra nan ta hopi incorecto manera boso sa cu nan municionnan. Nan no tin ningun tipo di precision. El a wordo haci door di Iran,” Trump a bisa. Secretario di Defensa Pete Hegseth, para tras di Trump a bordo di Air Force One, a bisa cu e asunto ta ainda bou di investigacion.
Atakenan di Iran a mata 10 persona na Israel. Por lo menos seis miembro di servicio Mericano a wordo mata. Nan restonan mortal a yega riba diasabra na un base di e forsa aereo na Delaware.