ATIA y Gobierno riba mesun liña pa bin cu Dialogo Nacional

Diaranson 30 di april, Prome Minister Mike Eman a reuni cu Directiva di Aruba Trade and Industry Association (ATIA) den cual a atende cu varios topico di interes comercial. Pa Prome Minister Eman, ta hopi importante pa tene dialogo regularmente cu gremio y sindicato cu e meta pa yega na un consenso riba e plataforma cu kier introduci di dialogo nacional.
Segun Presidente di ATIA Herrick Henriquez, despues di e ultimo encuentro cu formado Mike Eman y Gerlien Croes, awe a bolbe reuni cu Gobierno. A dialoga entre otro riba e status di e rijkswet y riba e fondo di inversion cu Gobierno kier bin cu ne. ATIA ta optimista cu Gabinete AVP-Futuro lo yega na un Consensus Rijkswet nobo, cu e meta pa yega na un tasa di interes reduci di 3.2%. Ta consciente cu e tardansa di parti di IMF, cu mester a entrega un conseho financiero como parti di e normanan cu mester entrega na Hulanda prome cu dia 1 di mei. E reduccion di interes di 5.1% pa 3.2% aki ta yuda Aruba den su finansa publico y por tin un efecto positivo pa pueblo, mirando cu tin mas placa cu ta keda Aruba y cu por inverti den entre otro asuntonan social y enseñansa. Prome Minister a sigura cu lo manda gran parti di e documentonan Hulanda na tempo pa por yega toch na e interes reduci.
Pa locual ta trata e fondo di inversion, ATIA ta sostene e pensamento aki, mirando cu ta facil pa continuamente traha proyectonan nobo, pero sin un plan structural di mantencion, esaki na final di dia lo costa Aruba mucho mas. Ademas a papia riba e scarsedad di labor cu tin actualmente, premirando e cantidad di camber di hotel cu lo bin acerca e aña aki ainda. Ademas a atende cu e tema di burnout di empleadonan tur caminda, cual mester mitiga mas tanto posibel, pero tambe mester stimula productividad laboral. Hunto cu Gobierno kier yega na algo inovativo pa trece cambio positivo pa Aruba. Como isla chikito, nos mester keda innova y adapta na cosnan nobo por por sigui ta competitivo den e mundo dinamico.
ATIA a comparti algun idea cu nan tin, pa loke ta trata innovacion, mehoracion y fortificacion di nos sistema di enseñansa. Tin necesidad hopi grandi di parti di comercio pa acopla nos enseñansa miho na e sector comercial. Locual cu ta duna den enseñansa, mester cuadra cu e demanda di comercio y ta esencial cu e hobennan cu termina scol por drenta e mercado laboral cu e preparacion adecua.
ATIA su vision ta importante pa hunto cu Gobierno, saca Aruba pa dilanti y percura pa en realidad comparti progreso cu henter comunidad.