Dia 3 mei a ser proclama como Dia Mundial di Libertad di Prensa na 1993 pa Asamblea General di Nacionan Uni, siguiendo un recomendacion di e Conferencia General di UNESCO.
E fecha a ser escogi pa coincidi cu e aniversario di e Declaracion di Windhoek, den cual representantenan di medionan di comunicacion africano cu tawata participa den un seminario organiza pa UNESCO den e capital di Namibia, a crea un documento den cual a formula e principionan di e libertad di prensa.
Segun estableci pa articulo 19 di e Declaracion Universal di Derechonan Humano,libertad di expresion ta un derecho fundamental: “Tur individuo tin e derecho di libertad di opinion y expresion; e derecho ta inclui e derechonan di no ser molesta a causa di bo opinion, investiga y recibi informacion y opinion, y e difusion di esakinan sin limitacion di frontera, y mediante cualkier medio di expresion”.
Teniendo e derecho aki na cuenta, Dia Mundial di Libertad di Prensa ta un oportunidad pa recorda e gobiernonan cu ta necesario respeta libertad di expresion y pa refleha riba e problemanan di libertad di prensa y e etica profesional. E ta un oportunidad pa:
- Celebra e principionan fundamental di libertad di prensa.
- Evalua e situacion di libertad di prensa na mundo.
- Defende e medionan di comunicacion contra atentado riba nan independencia.
- Rindi homenahe na periodista cu a perde nan bida cumpliendo cu nan deber.
2025 TEMA:
LIBERTAD DI EXPRESION FRENTE E REVOLUCION DI INTELIGENCIA ARTIFICIAL
E crecemento rapido y utilisacion di inteligencia artificial (AI) ta cambiando y reconfigurando periodismo, e medionan di comunicacion y libertad di prensa y expresion den un forma fundamental. Aunke e principionan di medionan liber, independiente y puralistico ta keda hunga un papel crucial, e impacto di AI riba recopilacion, tratamento y difusion di informacion ta profundo y ta presenta tanto oportunidadnan inovador como tambe retonan serio.
Inteligencia artificial por contribui na sostene libertad di expresion facilitando acceso na informacion, permiti mas hende comunica rond mundo y cambia e manera cu informacion ta corre mundialmente.
Na e mes momento AI ta trece riesgonan nobo. E por ser utilisa pa difundi informacion falso of eroneo, aumenta instigacion di odio online y favorece tiponan nobo di censura.
Algun actor ta usa AI pa vigilancia masivo digital di periodista, ciudadano y sociedad civil loke tin un efecto desanimador riba libertad di expresion.
E plataformanan grandi tecnologico ta usa AI pa filtra y controla e contenido cu por accesa online, locual ta converti nan den guardian poderoso di informacion.
E preocupacion ta creciendo cu AI por haci e medionan global di comunicacion cuminza parce otro cada bes mas, y reduci e puntonan di bista diferente cu ta tipifica periodismo pluralistico y caba cu e medionan di comunicacion chikito y independiente.
AI tambe por yuda automatisa e trabou di medionan di comunicacion, haci nan mas eficiente y yuda nan mantene e ritmo di demanda. Sinembargo na e mesun momento e salud financiero di hopi medio di comunicacion ta deteriora. Aplicacionan di inteligencia artificial generativo ta reusa contenido periodistico sin ningun tipo di recompensacion husto, kitando asina entrada di medionan independiente y pasando e entrada aki na e plataformanan tecnologico y empresanan di AI.
AI cada bes mas ta hunga un papel grandi den eleccionan, asistiendo den verificacion di datonan suministra pa politiconan (fact checking) y yuda combati desinformacion.
Tambe e ta proporciona aplicacionan pa sostene periodista y votador cu participacion democratico bon informa. Sinembargo AI tambe ta crea riesgo. E por ser utilisa pa crea contenido cu ta parce realistico pero falso, manera deep fakes (video manipula cu AI), loke por daña e confianza den sistema democratico.
Pa atende cu e retonan aki ta rekiri colaboracion entre gobiernonan, medionan di comunicacion y sociedad civil.
E Pacto Digital Global (UN Global Digital Compact) ta señala cu e ta importante atende cu e problemanan causa pa tecnologia y na mesun momento proteha privacidad y libertad di expresion.
Día Mundial di Libertad di Prensa 2025 ta enfoca riba con inteligencia artificial ta afecta libertad di prensa, liber circulacion di informacion, independencia di medionan di comunicacion y e obhetivo mundial di garantisa acceso na informacion y proteha libertadnan fundamental.
LIBERTAD DI PRENSA Y EXPRESION, CIENCIA Y DEMOCRACIA NA PELIGER
Na 2024 tema di Dia Mundial di Libertad di Prensa tawata “Prensa pa Planeta: Periodismo den cara di e crisis ambiental”. Concientisacion di tur aspecto di e crisis global ambiental ta esencial pa crea sociedadnan democratico. Trabou periodistico ta indispensabel pa e fin aki. Garantisa e visibilidad di e temanan aki ta crucial pa promove paz y valornan democratico den henter mundo.
- Atakenan riba e validez di ciencia ta representa un grave menaza pa e debate publico pluralistico y bon informa. Ta obvio cu informacion erroneo y falso tocante cambio climatico por, den algun caso, mina esfuerzonan internacional pa atende cu e tema aki.
E NGO global cu sede na Sur Africa CIVICUS a señala den su rapport “2024: People Power Under Attack”, parti di e campaña global di dicho organisacion pa monitorea e espacio civico, esta e espacio defini pa derechonan humano y civico pa opera di NGO, cu na mayoria di paisnan rond mundo e espacio civico ta disminuyendo.
Esaki ta bisto cu legislacion introduci y veredicto contra Just Stop Oil na Inglaterra y e veredicto den e caso den corte di Energy Transfer na Merca cu multa di 600 MIYON USD riba Greenpeace.
Na Washington presidente Trump e aña aki a ataca derechonan LGBTQIA+, maneho dirigi ariba diversidad, igualdad y Inclusion, derecho riba proceso debido pa ilegal, imigrante y legislacion ambiental. Proteccion di consumidor, cuido medico y social, subsidio pa ayudo humanitario local y internacional y fondo pa investigacion cientifico a ser para of elimina y autonomia di institucionan academico ataca.
Den e contexto aki periodistanan a ser califica como enemigo di pueblo pa nan trabou incesante pa desenmascara mentira y atakenan riba democracia y hasta e poder hudicial na Merca, coregiendo den forma continuo violacion di estado di derecho di politica di Trump.
Pero atake riba libertidad di expresion, ciencia y derecho humano y destruccion di medio ambiente sanciona pa beneficia industria di extraccion (gas, petroleo y mineral) no ta pasa na Merca so.
Internet a haci e distincion entre periodista, blogger, vlogger y tur hende cu ta pone informacion veridico online desaparece.
Y esey ta pone cu Libertad di Prensa de facto mundialmente a bira asunto pa un y tur defende y colectivamente trata di percura cu e influencia di tecnologia, particularmente inteligencia artificial ta keda monitorea y controla y tambe cu nos un y tur mester duna nos aporte na medionan di comunicacion independiente y puralistico sigui existi y keda suministra nos cu informacion veridico.