Secretario di Estado Marco Rubio a bisa cu Merca lo considera condicionnan di salud cronico manera obesidad, malesa di curason, cancer y diabetes, y asta factornan manera edad di pensioen como motibonan pa nenga visa na imigrantenan.
E medida aki ta expande e screening medico actual mas leu cu malesanan contagioso y ta duna oficialnan di visa hustificacion nobo pa rechasa aplicantenan, den e esfuerso mas recien di e administracion di Trump pa frena e fluho di imigracion.
“Bo mester considera salud di un aplicante,” un cable di Departamento di Estado a bisa.
“Cierto condicionnan medico – incluyendo, pero no limita na, malesanan cardiovascular, malesanan respiratorio, cancer, diabetes, malesanan metabolico, malesanan neurologico, y condicionnan di salud mental – por rekeri cientos di miles di dollar na cuido.”
E guia ta pidi oficialnan di visa tambe pa haci nan mesun evaluacion di cuanto condicionnan medico di un hende por costa Merca. “E aplicante tin recursonan financiero adecua pa kubri e gastonan di e cuido ey durante henter e speransa di bida cu e tin, sin busca asistencia publico di cen of institutonan di termino largo na gasto di gobierno?” e cable ta bisa.
Observadornan di e directiva nobo ta señala cu e administracion di Trump ta basando riba e idea cu e echo di tin un condicion medico ta crea un carga financiero pa Merca.