E operacion di rescate pa saca e lider di oposicion Venezolano y ganado di premio Nobel, María Corina Machado, for di Venezuela a envolve uzo di disfraz, dos boto pasando door di laman bruto y un buelo, segun e homber cu a bisa cu e la lidera esaki a conta BBC.
Yama “Operation Golden Dynamite” (Operacion Dinamita di Oro), e biahe peligroso tabata friu, muha y largo — pero e “formidabel” Machado no a keha ni un biaha, segun Bryan Stern, un veterano di forsanan special di Merca y fundado di e Grey Bull Rescue Foundation.
Laman ta hopi bruto. Basta preto. Nos ta uzando flashlight pa comunica. ‘Esaki ta duna hopi miedo, hopi cos por bay robes.’
A pesar di e riesgonan, nada a bay robes. Machado a yega sano y salvo na Oslo, Noruega pa ricibi su Premio Nobel di Paz net prome cu mey anochi diaranson.
Machado tabata biba scondi den su propio pais desde e eleccionnan ampliamente disputa na Venezuela aña pasa, y no a wordo mira den publico desde januari. Su yiunan adulto, kende e no a mira den dos aña, tabata na Oslo pa ricibi’e.
Grey Bull ta specialisa den misionnan di rescate y evacuacion, specialmente for di zonanan di conflicto y desaster.
Un representante di e ekipo di Machado a confirma na CBS News, e partner di media Mericano di BBC, cu e organisacion tabata tras di su operacion di rescate.
Sr. Stern a bisa cu Grey Bull tabata trahando riba un presencia den Caribe, incluyendo den Venezuela y e isla bisiña di Aruba, pa lunanan largo pa prepara pa posibel operacionnan na Venezuela.
“Nos a bin ta traha infrastructura riba tereno na Venezuela diseña pa saca Americanonan, aliadonan y Britaniconan y otro hende, si acaso guera cuminsa na Venezuela,” el a bisa BBC.
Speculacion a aumenta tocante posibel accion militar di Merca contra Venezuela, despues cu Presidente Mericano Donald Trump a pidi Presidente Maduro pa bandona su cargo, acusando e di manda narcotico y asesino pa Merca.
Sr. Stern a bisa cu e reto den e caso aki tabata pa saca un hende afo cu ta asina conoci manera María Corina Machado – un nomber masha conoci na Venezuela pa e oposicion.
Ningun di e infrastructura cu su firma a construi den e pais,” el a bisa, “tabata ‘diseña pa e di dos persona mas popular den e maldito pais cu un blanco riba su lomba.
Ora cu el a drenta den contacto pa prome biaha cu e ekipo di Machado, nan no a revela su identidad na cuminsamento, pero Sr. Stern a bisa cu e por a divina ken e tabata.
Ora nan a tuma contacto cun’e na cuminsamento di december, via un contacto cu tabata conoce e ekipo di Machado, aparentemente esaki tabata e di dos intento pa saca e for di Venezuela, despues cu un prome plan “no a bay bon,” Sr. Stern a bisa.
E operacion a wordo yama “Golden Dynamite” pasobra “Nobel a inventa dinamita” y Machado tabata purba yega Oslo pa acepta e Premio Nobel di Paz.
Cosnan a cana lihe. Sr. Stern a bisa cu el a papia cu e ekipo un diabierna, nan a mobilisa diadomingo, y pa diamars nan mision tabata cla. Su ekipo a explora varios posibilidad pa saca Machado for di e pais, y a dicidi riba un plan cu tabata encera un biahe turbulento via lama.
Pa proteha su trabou futuro na Venezuela, Sr. Stern por revela solamente cierto detaye tocante e biahe.
Via tera, nan a move Machado for di un cas caminda e tabata scondi, pa un punto di recohida pa un boto chikito, cual a hibe afo di costa na un boto un tiki mas grandi caminda el a topa cun’e.
E biahe tabata den “laman masha bruto” cu ola te cu 10 pia (3m) den “scuridad total,” el a bisa.
“E biahe no tabata dushi. Tabata hasi friu, tabata masha muha, nos tur tabata papa muha; e olanan tabata masha bruto, y nos a uza esey na nos bentaha. Nos a hibe tera y caminda su avion tabata, y el a bula pa Noruega.”
Durante henter e biahe, el a agrega cu a tuma varios medida pa sconde y disfrasa cara di Machado, mescos cu su perfil digital pasobra e ta asina conoci.
“E menasa biometrico ta asina real,” el a nota, agregando cu a tuma medidanan pa sigura cu no por a rastre’e via su telefon.
El a bisa cu Machado tabata ‘formidabel’ a pesar di e condicionnan, aceptando un trui pa calor, pero sin pidi pa nada otro.
“E tabata papia muha y congelando di friu y no a keha ni un biaha,” el a hari, reconociendo cu e operacion tabata hopi peligroso pasobra awa no ta ‘pordona’.
“Si mi ta stuur un boto y un motor rementa, mi ta landa pa Venezuela.”
Ora a puntr’é con e por garantisa seguridad di e Venezolanonan cu a yuda cu e operacion, Sr. Stern a bisa cu nan a mantene nan identidad secreto y ‘nos [Grey Bull] ta haci hopi operacion di engaño’.
El a bisa cu e operacion tabata financia pa donadornan, y no pa gobierno di Merca: “Nunca nos a haya un nota di gradicimento di gobierno di Merca, corda un dollar.”
Sr. Stern a bisa cu el a coordina cu algun estado nacional, y cu servicionan di inteligencia i diplomatico di varios pais. Esaki a inclui alerta Merca na un manera “informal”.
Machado a bisa cu e tin intencion di regresa Venezuela, pero Sr. Stern a bisa cu el a consehe pa no haci esei.Hopi di esnan cu a yuda no a ni realisa cu nan tabata traha p’e, Sr. Stern a bisa, mientras otronan ta kere cu nan “sa e storia completo”, pero en realidad nan no sa.
Mi a bis’e: ‘No bay bek. Bo ta un mama. Nos tin mester di bo.’ E ta bai haci loke e ta bai haci… Mi ta compronde dicon e kier bay bek, pasobra e ta un heroe pa su pueblo. Mi ta desea cu e no bai bek; pero mi tin un presentimento cu e lo bay.