NEW YORK, 7 di februari (Reuters) – Companianan cu kier bende remedi pa baha peso directamente na e consumidor, incluyendo Wegovy di Novo Nordisk, lo gasta miyones di dollar pa propagandanan yena cu celebridad durante e Super Bowl di diadomingo, cu e promesa di un di e audiencianan global mas grandi di aña.
E anuncio di 90 seconde di Novo tin e comediante y strea di SNL Kenan Thompson anunciando e pildora nobo di Wegovy na Merca. Hunto cu e productor di musica DJ Khaled, e ta suguri na un manera di joke cu hende cu obesidad por beneficia di e remedi mescos cu nan lo beneficia di un pildora pa siña parkeer auto of pa rescata pushi for di den palo di fruta.
E compania di ‘telehealth’ Ro lo presenta e strea di tennis Serena Williams den su prome propaganda pa Super Bowl, mientras cu un anuncio di Hims & Hers Health tin e voz di e rapper Common cu e frase: ‘Hende rico ta biba mas largo’.
E sistema di cuido di salud na Merca ta ofrece Mericanonan rico terapianan di lujo cu ta permiti nan ‘biba mas largo’, Common ta bisa riba tag line di hende rico ricibiendo un variedad di tratamentonan exotico y probablemente hopi caro, prome cu e splica con e productonan di Hims por democratisa cuido di salud pa tur consumidor.
E ‘advertising blitz’ aki ta refleha e cambio mas amplio pa marketing directo na e consumidor cu e lansamento di e versionnan nobo den pildora di e remedinan pa baha peso GLP-1, segun expertonan di industria y analistanan.
Lilly ta enfoca riba e programa prome cu e wega (Pre-game show).
E compania Danes Novo Nordisk y Eli Lilly, basa na Indianapolis, ta den un lucha pa e mercado awor cu miyones di Mericano a cuminsa uza e remedinan inyectabel GLP-1 cu ta hopi efectivo. Novo a caba di lanza su pildora di Wegovy, y ta spera cu e pildora pa baha peso di Lilly lo wordo aproba den april.
Lilly tin plan di haci propaganda pa Zepbound durante e programa prome cu e wega (pre-game show) di NBC, como tambe durante e wega riba su servicio di streaming Peacock, segun un vocero a informa.
‘E Super Bowl ta un di e miho canalnan pa conecta cu miyones di consumidor,’ Kevin Gade a bisa, kende ta hefe operacional na Bahl & Gaynor, un compania cu tin accionnan den Lilly. El a nota cu e Super Bowl ta e evento poco comun caminda e consumidornan mes ta busca e propagandanan di television activamente, locual ta duna hopi balor na creatividad y hopi biaha humor cu por genera un impacto enorme.
Propagandanan durante e di 60 Super Bowl di e aña aki, caminda e Seattle Seahawks lo enfrenta e New England Patriots, ta costa te cu $10 miyon pa un espacio di 30 seconde, segun Adweek.
Ta spera cu rond di 130 miyon persona lo wak e wega diadomingo, segun proyeccionnan di Nielsen. NBC a declara cu e espacionan di propaganda pa su servicio di streaming Peacock ta costa mas o menos mitar di e prijs di esnan cu ta wordo mustra riba su red di transmision tradicional.