Ex Minister di Finansa y actual Parlamentario Xiomara Maduro a comparti su punto di bista riba e conclusion di Algemene Rekenkamer Aruba (ARA) tocante Cuenta Anual 2020 di Pais Aruba. ARA ta opina cu Gobierno den aña 2020 no tabata suficientemente transparente. Sinembargo evaluacionnan di CAFT, Raad van Advies y Parlamento ta mustra un cuadro diferente.
“Ta importante pa pone e conclusion di ARA den contexto di e otro evaluacion institucional di e mes periodo,” Maduro ta señala.
College Aruba financieel toezicht (CAFT) a reconoce e progreso den e presupuesto, Ontwerpbegroting 2020, ora cu ela declara:
“Er zijn in de OB 2020 duidelijke stappen gezet waardoor de leesbaarheid is verbeterd en de inzichtelijkheid van de begroting is vergroot.”
Ademas, Raad van Advies no a haci ningun observacion riba e cambionan introduci. Parlamento, cu a aproba e presupuesto 2020 unanimamente, tampoco no a trata e cambionan den presentacion di e presupuesto como un punto di preocupacion. Hasta ARA mes a indica cu e incumplimentonan cu presupuesto a baha significativamente di 90 pa 9, cu ta mustra e efecto positivo di e cambionan aplica.
Maduro ta enfatisa cu e diferente evaluacionnan ta duna un bista mas amplio y mas balansa, unda tanto e mehoracion realisa como punto di atencion merece consideracion.
Den e discusion publico cu ta surgi awo cu ARA ta cuestiona e transparencia den 2020, mester tene cuenta tambe cu tur evaluacion institucional relevante, ya cu CAFT, Raad van Advies y Parlamento tin un otro opinion cu ARA riba aña 2020.
Screenshot
Screenshot