Chauffeur burachi a causa boksmento riba caminda di Solito

Solito – Diaranson anochi den careda di 11’or a sosode un boksmento cu basta daño material riba e caminda di Solito pa Tanki Leendert.

Informacionnan cu a drenta a papia di hende herida, pero na yegada di polis no tawata tin heridos.
Pero si agentenan a capta cu un di e chauffeurnan lo ta bou influencia. A haci e testnan necesario y e la wordo deteni.

Locual a sosode ta cu e chauffeur di e Yaris a yega e crusada T, pero a gewoon sigui core y dal contra un SUV Hyundai pasando.

Chauffeurnan no tur, pero tin hopi no ta importa cu nan ta subi core auto bou influencia y cu tur e consecuencianan negativo cu esaki ta trece cu ne.