ORANJESTAD, Aruba – 09 februari 2026: Instituto di Calidad den Cuido di Salud (KIG) ta anuncia cu orguyo e lansamento di su website nobo y portal digital pa registracion, AruREG.
For di dia 2 di februari 2026, e website www.kig.aw ta oficialmente activo. E website a wordo estableci como e plataforma central di KIG pa informacion tocante calidad den cuido di salud na Aruba, incluyendo tambe normanan, guianan, leynan y reglamentonan relevante. Ademas di informacion, ta posibel pa entrega solicitudnan di registracion di manera digital via e website. Pa profesionalnan di salud, esaki ta bay pa medio di e portal AruREG.
Cu e introduccion di e portal AruREG, KIG ta pone fin na e formulario digital unico cu tabata wordo usa pa solicitudnan di profesionalnan. E ambiente nobo di portal ta garantisa un proceso mas eficiente y transparente. Solicitantenan por maneha nan propio dossier y sigui directamente status di nan solicitud.
Na e momento aki, e portal ta destina exclusivamente pa solicitudnan di registracion nobo dentro di e cinco gruponan profesional legalmente establece, esta dokter, apotheek, fisioterapista, dentist y partera. Ora leynan y reglamentonan pa otro grupo di profesional drenta na vigor, e portal AruREG lo wordo amplia di manera gradual.
E lansamento di www.kig.aw y e portal AruREG ta solamente e comienzo. KIG lo sigui desaroya e website y e portal pa fortalece e provision di informacion, servicio y sosten na bienestar di calidad den cuido di salud na Aruba, dentro di su tarea legal.
Pa mas informacion like nos Facebook page Directie Volksgezondheid DVG Aruba, Follow nos riba Instagram directie_volksgezondheid_aruba, subi nos website www.dvg.aw, yama nos na 5224200 of mail nos na [email protected]