ORANJESTAD – Recientemente Parlamentario Evelyn Wever-Croes y Rocco Tjon a reuni cu fundacion FADA. Gabinete Wever-Croes II, den presupuesto 2025, a aloca 500 mil florin extra pa dicho fundacion, pa proyectonan importante cu nan ta haci pa combati abuso di droga y pa promove salud mental. Den total Gabinete Wever-Croes a aloca 3 miyon florin pa diferente fundacion y FADA ta un di nan.
Lamentabelmente e Gobierno nobo riba nan prome dia di trabou, sosteni pa Parlamentarionan di AVP y Futuro, a corta e fondonan aki. Minister Geoffrey Wever na final a pidi fraccion di MEP mas informacion riba e tema aki, pa asina por evalua e situacion y wak si toch por duna e fundacionnan aki e extra subsidio. Riba e peticion di Minister Wever pa haya mas informacion, Parlamentario Wever-Croes y Tjon a pidi un reunion cu fundacion FADA, cual recientemente a tuma luga.
Durante e reunion FADA a indica cu pa falta di fondo mester a laga trahadonan bay cu e consecuencia di no por sigui enfoca riba prevencion manera nan a bin ta haciendo y manera nan a proyecta pa haci. FADA ta conoci di ta duna mas di 300 charla den diferente trayecto cu ta exigi personal na e scolnan. Aparte di esaki, fundacion FADA ta organisa varios conferencia pa crea conscientisacion riba e consecuencianan di abuso di droga, y riba con un persona lo por yuda su mes pa mantene nan salud mental prome cu recuri na ayudo profesional.
Fundacion FADA tambe a indica cu nan a conta riba e extra fondo aki pa por cumpli cu nan proyectonan riba prevencion di abuso di droga y riba salud mental. Cu e fondo aki tambe nan a keda di profesionalisa nan personal existente y busca mas personal pa por duna e asistencia necesario.
Parlamentario Wever-Croes a indica cu e reunion a bay hopi bon na unda nan a haya e informacion necesario di fundacion FADA, y cu esaki a compromete nan mes pa haci nan maximo esfuerso pa convence Gobierno pa aloca e fondonan aki bek pa e fundacion.
Aparte di esaki, durante e reunion, tambe a toca e tema di e conferencia di FADA “We Need To Talk”.
E conferencia aki a wordo organisa pa conscientisa y duna informacion di con un persona por traha riba nan mes pa asina mehora nan salud mental. Tambe participantenan lo siña con pa yuda nan mes mirando cu tin biaha ayudo profesional por tarda.
Parlamentario Wever-Croes kier a invita pueblo en general pa asisti na e conferencia importante aki cu lo tuma luga dia 21 di Mei di 6 pm – 9 pm na Cas di Cultura. Ainda tin tickets disponibel pa un suma di Awg 45. Ban tur atende e conferencia aki pa asina hunto nos por bringa e malesa di salud mental.
