President Donald Trump a lanta preocupacionnan nobo tocante su salud debi na un rasca visible cu casca (scabbing rash) na su nek.
Esaki ta djis e ultimo den un serie largo di sintomanan cu ta persigui e presidente durante e ultimo aña.
Donald Trump a bolbe lanta preocupacion tocante su salud despues cu el a wordo mira cu loke tabata parse un rasca cu casca na su nek durante un ceremonia di Medal of Honor.
For di enkelnan hincha te na mannan cu herida di golpi misterioso, por bisa sigur cu e salud di Trump a bira un tema cayente bou di Mericanonan desde cu el a regresa den funcion pa un di dos termino, sigurando su luga den e bukinan di record como e presidente di mas bieu den historia di Merca.
Tog, apesar di e insistencia di su dokternan y di Cas Blanco cu e ta e imagen perfecto di salud, esaki no a impedi publico di nota e yegada di un otro sintoma nobo.
Imagennan di e detaye nobo di salud aki a sali na luz pa prome biaha durante un ceremonia di “Medal of Honor” na Cas Blanco dialuna (2 di Maart), y a mustra loke tabata parse un rasca cora grandi y cascanan na e banda drechi di e nek di Trump, cual tabata extende for di tras di su horea te na e parti patras di e liña di su cabey.
Kico Cas Blanco a bisa tocante e herida na nek di Trump?
Maske por tin un cantidad di causa tras di e herida misterioso di e presidente di 79 aña, e dokter di Cas Blanco, Dr. Sean Barbabella, a bisa den un declaracion: “President Trump ta uzando un crema hopi comun na e banda drechi di su nek, cual ta un tratamento preventivo pa cuero, prescribi pa e Dokter di Cas Blanco.”
“E presidente ta uzando e tratamento aki pa un siman, y ta spera cu e cora lo dura pa algun siman,” Dr. Barbabella a agrega. E no duna detaye pakico a prescribi e crema.
Ademas di e rasca cu a nota na su nek, a mira tambe un herida di un golpi na e man drechi di Trump, cual atrobe tin un capa di makeup riba dje.
Pa mas cu un aña, continuamente a mira e Presidente di Estados Unidos cu herida di golpi na su man, cual aparentemente ta cubri cu makeup mientras e ta cumpli cu su debernan di tur dia.
Den pasado, algun Mericano tawata tin e teoria cu e manchanan por tawata resultado di varios biaha cu a saca sanger, sinembargo, secretaria di prensa di Cas Blanco, Karoline Leavitt, a rechasa e speculacion aki ora el a explica cu e heridanan di golpi tawata ‘pasobra e ta constantemente trahando y dunando man henter dia, tur dia’.
El a agrega: “President Trump ta un homber di pueblo y e ta topa mas Mericano y duna nan man diariamente cu mas cu cualkier otro presidente den historia.”
“Su compromiso ta firme y e ta prueba esey tur santo dia.”
Trump mes tambe a duna un poco mas di claridad riba su heridanan di golpi, ora el a confesa na januari na The Wall Street Journal cu e ta tumando 325mg di aspirina pa dia, en bes di e 81mg cu ta wordo recomenda pa un regimen di salud di curason.
“Nan ta bisa cu aspirina ta bon pa haci sanger fini, y mi no kier sanger diki coriendo den mi curason,” Trump a bisa. “Mi kier sanger fini y bunita coriendo den mi curason. Esey tin sentido?”
Ademas di e heridanan di golpi, anteriormente a diagnostica Trump cu problema di circulacion, un condicion comun unda e murayanan di e adernan di e pianan of e valve nan ta debilita, loke ta haci cu sanger ta keda stanca en bes di vloei bek pa e curason. Esaki por conduci na pianan pisa, doloroso y hincha — o tin biaha asta cambionan den cuero manera discoloracion of ulceranan.