DUBAI, Emiratonan Arabe Uni (AP) — E morto di e Lider Supremo Ayatollah Ali Khamenei despues di casi 37 aña na poder ta lanta preguntanan di sumo importancia tocante e futuro di Iran.
E contrastenan di un proceso di sucesion compleho a cuminsa tuma forma e mainta despues di e morto di Khamenei den un campaña di ataquenan aereo door di Estados Unidos y Israel.
Conseho di liderazgo temporal
Segun e constitucion di Iran, diadomingo a forma un conseho pa asumi e tareanan di liderazgo y goberna e pais.
E conseho aki ta consisti di e presidente actual di Iran, e hefe di e poder hudicial di e pais y un miembro di e Conseho di Guardiannan (Guardian Council) scohi door di e Conseho di Expediencia (Expediency Council), kende ta duna conseho na e lider supremo y ta resolve disputanan cu parlamento.
E presidente reformista di Iran, Masoud Pezeshkian, y e hefe di e poder hudicial estricto, Gholamhossein Mohseni Ejei, ta e miembronan cu lo drenta pa “asumi temporalmente tur e tareanan di liderazgo.”
Panel di clericonan
Aunke e conseho di liderazgo lo goberna durante e periodo interino, un panel di 88 miembro yama e Asamblea di Expertonan “mester, mas pronto posibel” scoge un lider supremo nobo segun ley di Iran.
E panel ta consisti completamente di clericonan Shiite cu ta wordo eligi door di pueblo cada ocho aña y kendenan nan candidaturanan ta wordo aproba door di e Conseho di Guardiannan, e organo cu ta vigila e constitucion di Iran.
E organo ey ta conoci pa descalifica candidatonan den varios eleccion na Iran y e Asamblea di Expertonan no ta diferente. E Conseho di Guardiannan a prohibi e ex-presidente di Iran, Hassan Rouhani—un persona relativamente modera kende su administracion a sera e deal nuclear di aña 2015 cu e potencianan mundial—di participa den e eleccion pa e Asamblea di Expertonan na maart 2024.
E yiu di Khamenei
Deliberacionnan clerical tocante e sucesion y e maniobranan compleho tras di esaki ta tuma luga leu for di bista di publico, locual ta haci dificil pa determina ken por ta e principal candidatonan.
Anteriormente, tabata wordo pensa cu e studiante di Khamenei, e presidente estricto Ebrahim Raisi, por a purba tuma e mando. Sinembargo, el a muri den un accidente di helicopter na mei 2024.
Esaki a laga un di e yiunan di Khamenei, Mojtaba, un clerico Shiite di 56 aña, como un candidato potencial, maske e nunca a fungi den un puesto gubernamental.
Pero un traspaso di tata pa yiu den e caso di un lider supremo por lanta rabia, no solamente cerca e Iraninan cu ya caba ta critico di e mando clerical, sino tambe cerca e mesun partidarionan di e sistema. Algun por mira esaki como algo contra e principio Islamico y cu ta bin mescos cu creacion di un dinastia religioso nobo, despues di e caida na 1979 di e gobierno di Shah Mohammad Reza Pahlavi, kende tabatin sosten di Merca.
Transicion raro
Tabatin solamente un otro traspaso di poder den e oficina di lider supremo di Iran, e principal ehecutor di decisionnan for di tempo di e Revolucion Islamico di e pais na 1979.
Na 1989, Gran Ayatollah Ruhollah Khomeini a muri na e edad di 86 aña, despues di tabata e figura central di e revolucion y a guia Iran durante su guera di ocho aña cu Irak. E transicion aki awor ta bin tambe despues cu Israel a lansa un guera di 12 dia contra Iran na juni 2025.
Podernan grandi
E lider supremo ta e curason di e teocracia[estado religioso] Shiite di Iran y su sistema compleho di reparticion di poder, y e tin e ultimo palabra riba tur asunto di estado.
E ta fungi tambe como e comandante en hefe di e forsa militar di e pais y di e poderoso Guardiannan di Revolucion (Revolutionary Guard), un forsa paramilitar cu Estados Unidos a designa como un organisacion terorista na 2019, y cual Khamenei a duna hopi poder durante su mando.
E Guardia, cu a lidera loke nan mes ta yama e “Ehe di Resistencia,” un serie di gruponan miliciano y aliadonan den henter Medio Oriente cu tin como meta pa contraresta Estados Unidos y Israel, tambe tin rikesa y propiedadnan extenso na Iran.