Mas cu un decada pasa, e buelo Malaysia Airlines 370 a disparce sin laga ningun rastro, loke a causa uno di e misterionan mas grandi den historia di aviacion.
A pesar di añanan di buskeda Multinacional, investigadornan ainda no sa exactamente kico a pasa cu e avion of cu e 239 pashero y tripulante.
Diaranson, gobierno di Malaysia a bisa cu un barco a cuminsa cu un operacion di buskeda nobo pa e avion perdi, loke a lanta speransa cu finalmente por haya e aparato.
Un buskeda masivo anterior den e parti zuid di Oceano Indico[Indische Oceaan], unda ta kere cu e avion a cay, no a resulta den casi nada. Fuera di algun pida chikito cu a laba yega canto di lama, nunca a recupera ningun curpa of pida grandi di e restonan di e avion.
Aki tin loke bo mester sa tocante e tragedia fatal di aviacion aki.
E vuelo ta disparce
Na momento cu e vuelo MH370 a sali for di Kuala Lumpur pa 12:41 di marduga ora local, e tabata un biahe rutinario pa Beijing. Sinembargo, menos cu un ora despues di a lanta, tur comunicacion cu e cockpit a stop. E avion a disparce for di radar civil net ora e tabata cruzando e lama entre Malaysia y Vietnam, sin manda ningun señal di emergencia.
“Good night, Malaysian Three Seven Zero” e piloto a bisa den e ultimo yamada via radio pa Kuala Lumpur y e comunicacion final prome cu e avion a cruza pa drenta e espacio aereo di Vietnam y a faya di raporta cerca e controladornan ey.
Minuutnan despues, e transponder di e aparato a stop di transmiti su ubicacion. Radar militar a mustra cu e jet a bira bek riba e Laman di Andaman. Datonan di satelite a sugeri cu e avion a sigui bula pa oranan largo, posiblemente te ora cu e combustibel a caba, prome cu el a cay den un parti remoto di e zona zuid di Oceano Indico.
Teorianan tocante kico a pasa ta varia for di secuestro te na despresurizacion di e cabina of fayo di coriente. No tabatin ningun yamada di emergencia, demanda di rescate, evidencia di fayo tecnico of tempo extremo malo.
Investigadornan di Malaysia na aña 2018 a declara e pasheronan y e tripulacion liber di tur sospecho, pero nan no a descarta “interferencia ilegal.” Autoridadnan a bisa cu un persona deliberadamente a corta e comunicacionnan y a cambia e ruta di e avion.
No ta comun cu avionnan ta disparce den profundidad di lama, pero ora esaki sosode, e restonan por ta hopi dificil pa localisa. Durante e ultimo 50 añanan, decenas di avion a disparce, segun e Aviation Safety Network.
E buskeda ta wordo habri atrobe
Gobierno di Malaysia a duna luz berde na maart pa un otro contrato di “no haya, no paga” cu Ocean Infinity pa reanuda e operacion di buskeda na e fondo di lama den un sitio nobo cu ta abarca mas cu 15,000 kilometer cuadra (5,800 milla cuadra) di awa. Ocean Infinity lo ricibi un pago di $70 miyon solamente si nan descubri e restonan di e avion.
Sinembargo, e buskeda a wordo suspendi na april pa motibo di tempo malo. Gobierno a bisa diaranson cu Ocean Infinity lo reanuda e buskeda intermitentemente cuminsando dia 30 di december pa 55 dia den areanan specifico unda nan ta kere tin e probabilidad mas halto di haya e avion perdi.
No ta duidelijk si Ocean Infinity tin evidencia nobo di e posicion di e avion. E compania a bisa cu nan lo uza tecnologia nobo y cu nan a traha cu hopi experto pa analisa datonan y reduci e area di buskeda na e sitio mas probable.